Zëvendëskryeministri i parë i Republikës së Kosovës, Besnik Bislimi ka dhënë detaje rreth sulmit në Banjskë, ku tha se Qeveria ka dërguar 48 faqe raportimi në Bruksel.
Bislimi këto deklarime i bëri gjatë një konference për medie ku tha se kanë dokumentuar disa pika që tregojnë veturat, armatimet, fotografitë, sqarimet dhe të dhënat statistikore që kanë të bëjnë me këtë rast.
Tutje, Bislimi ka shtuar se e ka parë këtë dokument dhe e ka aprovuar para se t`a dërgojnë në Bruksel.
“Qeveria e Republikës së Kosovës ka dërguar zyrtarisht përmes Ministrisë së Punëve të Jashtme portofolin edhe Ambasadës në Bruksel, raportimin dhe informimin 48 faqesh me fotografi, sqarime informata, të dhëna statistikore që janë të rëndësishme dhe të indetifikuara që kanë të bëjnë me llojin e armatimit të përdorur, logjistikën, komentet përcjellëse që dokumentojnë veturat, armatimin. Unë e kam parë këtë dokument e kam aprovuar para se ka shkuar”, deklaroi Bislimi.
Ndryshe, sulmi në Banjskë u përshkrua si një nga incidentet më të rënda ndër vite dhe ndodhi pas disa muajsh tensione të larta midis Kosovës dhe Serbisë.
Më 24 shtator grupe të armatosura sulmuan Policinë e Kosovës në fshatin Banjskë të komunës së Zveçanit, duke vrarë rreshterin Afrim Bunjaku./teve1.info/
