Faton Aliti analist nga Maqedonia e Veriut, ka vlerësuar se mosunifikimi i kandidaturave për president të Maqedonisë Veriore, është e dëmshme.
Ai vlerëson se kandidati i opozitës shqiptare, Arben Taravari, ka qenë pengesë për mosarritjen e një marrëveshje për një kandidat të përbashkët.
Aliti thotë se opozita po mundohet ta paraqesin Taravarin si kandidat nga Albin Kurti dhe Edi Rama.
“Vetë fakti se nuk pranoi t’i vazhdojë bisedat, siç shprehen ata dhe vetë fakti se po mundohen te na binin se pas kandidaturës së Arben Taravarit qëndron edhe Albin Kurti e Edi Rama, për këtë të parin ndoshta edhe është ashtu, por për këtë dytin nuk jam i sigurt, nuk shoh shenja që përkrah ndonjërin nga kandidatët”, ka thënë ai në emisionin “Këndi Debatit” në Tëvë 1.
Sa i përket kandidaturave për president nga radhët e shqiptarëve, ai ka thënë se më e qëlluara është ajo e BDI-së, ku kandidat është Bujar Osmani, aktualisht Ministër i Jashtëm i Maqedonisë së Veriut.
“Sepse të udhëheqësh me komunën është punë shumë e madhe me përgjegjësi, por nuk ka asnjë pikë të përbashkët me pozicionin president të shtetit dhe në këtë aspekt kandidatura më e qëlluar më duket ajo e BDI-së”, ka thënë ai.
Zgjedhjet parlamentare në Maqedoninë e Veriut do të mbahen më 8 maj 2024, së bashku me rundin e dytë të zgjedhjeve presidenciale. Rundi i parë për zgjedhjen e presidentit e vendit do të zhvillohet më 24 prill.
