Përveç sëmundjes që kanë, ata duhet të përballen edhe me probleme të tjera.
Pacientët në Klinikën e Onkologjisë në QKUK vazhdojnë të ankohen për mungesë të barnave e infuzioneve.
Njëri prej tyre është edhe Rexhep Aliu.
“Duhet me i ble ka të mundem, në Durrës vëllau nuk ka gjetë. Që dy vjet jam këtu që dy javë tu ardh. Do infuziona qysh thirren tybe nuk e di, 20 euro një, llogarite 6 copa, ka 20 euro, 120 euro në javë, rroga vetëm për infuziona, a duhet me pagu rrymë, me honger”, shprehet ai.
Ndërsa një tjetër ka gruan që përballet me kancer, por me një pension, po e ka të vështirë t’ia dalë.
Shoqen e kam me kancer, edhe janë duke i bërë terapiat, kushtet nuk i kemi aq shumë si me thënë valla por po duhet mos me u end sepse nuk i kemi kushtet e mira, penzia e vogël, e kam 280 euro”, thotë Zenel Halimi.
Por ndryshe u shpreh Lirije Kroni, e cila ka që 6 vjet që përballet me sëmundje të rëndë.
“Deri sot nuk kam pasur asnjë ankesë dmth barnat janë kanë krejt këtu çka mu kanë desht mu. Edhe para 4 vite e gjysme kam qenë sëmurë nuk kam pagu asgjë, as tani që një vit e gjysmë jam me terapi, tani kam me vazhdu me rrezatime, prap me kimioterapi por nuk ka asnjë problem, thotë ajo.
E rastet e prekura me kancer janë rritur në dy muajt e parë të këtij viti krahasuar me vitin e kaluar.
“Mbi 350 raste të reja janë regjistruar për dy muaj, pra nga janar deri në shkurt. Numri është diçka më i lartë se në vitin e kaluar, por ka tendencë për rritje.”
Në vitin 2024 ishin regjistruar rreth 2150 raste me kancer, përafërisht numër të njëjtë sa në vitin 2023.
