U dhuruan lule për Ylfete Humollin, 16 vjeçaren që u vra më 1 shkurt të vitit 1990 gjatë një proteste kundër regjimit të Serbisë në Kosovë.
Rezistenca e saj për liri është vulosur në historinë e shtetit të Kosovës.
E krenare për të bijën që ra dëshmore është nëna Sevdije, e cila 9 vjet më vonë kishte humbur edhe djalin e saj, Mentorin për të njëjtën kauzë.
Nga varrezat e fshatit Lupq i Poshtëm të Podujevës, ajo thotë fjalët më të mira për të bijën.
“Vendosmëria e tyre më ka lënë përshtypje shumë kur këta e kanë dhënë jetën pa u frikësu, me dal në demonstrata e me vdek për këtë atdhe nuk është pak. Qysh me thonë, ka qenë e mirë për shoqe, e mirë për prindër e për krejt, tani edhe vëllau qashtu i shkoj po çka me bë. Lum ata për vdekjen e tyre, për atdhe e shtrenjtë është jeta”, tha nëna, Sevdije Humolli.
Për të përkujtuar veprën e Ylfete Humolli i pranishëm ishte edhe i pari i Podujevës, Shpejtim Bulliqi.
“Rënia e Ylfetës në atë kohë ishte një lajmëtar i parë i lirisë së vonuar për Kosovën prandaj sigurisht që meriton të përkujtohet në kësi lloj forme dhe respektimi i dëshmorit të lirisë e atyre të cilët dhënë më të shtrenjtën për lirinë tonë besoj që është nderim për gjithë neve”, tha Bulliqi.
Në homazhe mori pjesë edhe ministrja e Drejtësisë, Albulena Haxhiu dhe Ministri i Mbrojtjes, Ejup Maqedonci.
35 vjet më parë, Ylfete Humolli, nxënëse e shkollës ekonomike u vra nga forcat serbe gjatë protestës kundër regjimit të atëhershëm buzë rrugës Podujevë-Prishtinë
Ylfete Humolli ka lindur në fshatin Lupç të Poshtëm të Podujevës.
