Kryetari i PDK-së, Memli Krasniqi, tha se i ka ofruar presidentes së vendit mbështetje morale e politike pas zhvillimeve të fundit në veri të vendit, raporton teve1.info
Krasniqi këto deklarime i bëri pas takimit me presidenten e vendit, Vjosa Osmani dhe drejtorin e AKI-së, Petrit Ajeti.
Krasniqi tha se nga e para e shtetit u informua rreth situatës së sigurisë dhe sulmit terrorist të ndodhur 3 ditë më parë në Banjskë të Zveçanit.
Krasniqi tha se i ka shprehur mirënjohjen e tij për të gjitha institucionet e sigurisë e në radhë të parë Policinë e Kosovës e cila sipas Krasniqit nuk ka reshtur tash e 24 vjet duke e bërë krenar shtetin e Kosovës, derisa shtoi se shembulli më i mirë i kësaj është heroi i fundit, Afrim Bunjaku.
“Nuk ka asnjë dyshim që shteti serb është përfshirë në sulmin terrorist kundër Kosovës. Edhe për faktin që tashmë është konfirmuar pjesëmarrja dhe drejtimi i sulmit nga Milan Radojiqiqi, edhe për numrin e madh të armatimit të sofistikuar, edhe për faktin që po mirëpriten dhe thuren lavde heronjve dhe terroristëve që e sulmuan shtetin tonë e po ashtu që kanë shpallur ditë zie për këta terroristë”, tha Krasniqi.
Ai tha se në situata të tilla, interesi i PDK-së është vetëm një, ai nacional.
“Në situata të tilla kur është cenu sovraniteti i vendit tonë, integriteti i Kosovës, shtetësia e vendit për të cilën është sakrifiku kaq shumë, gjeneratë pas gjenerate, në momente si kjo për PDK është vetëm një interes mbi të gjitha, interesi nacional. Dhe kjo është arsyeja që siç e kemi shpreh do të japim mbështetje të plotë jo vetëm morale por edhe politike e çfarëdo qoftë për institucionet e vendit tonë që janë në linjën e parë të mbrojtjes në shtetin tonë të përbashkët”, u shpreh Krasniqi.
Ai i bëri thirrje Bashkësisë Ndërkombëtare që të rris presionin kundër Serbisë, shtetit që siç tha Krasniqi tash zyrtarisht dihet që ka qenë sponsorizues i këtij krimi e terrori kundër qytetarëve të Kosovës.
Krasniqi po ashtu bëri thirrje që terroristët të dorëzohen në Kosovë, të gjykohen e dënohen sipas ligjeve në fuqi.
