Numri i inspektorëve është shtuar e rrjedhimisht sipas Ministrisë së Industrisë, edhe inspektimet janë rritur.
Sipas të parës së këtij dikasteri Rozeta Hajdari, ndonëse numrin e inspektorëve e kanë rritur në 27, sërish është në pikëpyetje, mjaftueshmëria e mbulimit të tregut.
“Kemi rritur edhe numrin e inspektorëve për këtë vit pasi që jemi sfiduar me staf të paktë të inspektorëve, me gjithsejtë 27 inspektorë në MINT. Por sa mjaftojnë këta inspektorë në gjithë tregun e Kosovës? Disa inspektorë komunalë nuk kanë vepruar sa duhet…”, ka thënë ajo.
Teksa i quan të pamjaftueshëm, deputetja e AAK-së Albana Bytyqi thotë se me 27 inspektorë, kjo ministri po lejon keqpërdorimet në treg.
“Ministria e Industrisë në fakt me një numër të tillë të inspektorëve veçse lejon më tej keqpërdorimet në rritje të çmimeve, çka më së shumti prek qytetarët të cilët çdo ditë e më shumë po përballen me to. Prandaj përgjegjësia kryesore për abuzimin e çmimeve, duke përfituar bizneset e ka pikërisht kjo ministri. Patjetër duhet të rritet edhe më shumë numri i inspektorëve në mënyrë që të mos lejohet më ky abuzim me rritje çmimesh madje edhe të produkteve bazë”, ka thënë Bytyqi.
Shtimin e tyre e sheh të domosdoshëm edhe ekonomisti, Besnik Avdiaj.
“Numri i inspektorëve është i pamjaftueshëm për të mbuluar kërkesën në mbarë territorin e Kosovës. Veçanërisht në këtë situatë të tillë të krizës kur dyshimet për manipulime vetëm sa po shtohen. Viktimat e këtyre abuzimeve në fund të ditës janë konsumatorët, gjegjësisht qytetarët e RKS. Prandaj shtimi i numrit të tyre dhe rritja e inspektimeve për të parandaluar dhe për të penalizuar abuzimet me çmimet në treg konsumatorëve dhe qytetarëve të tjerë të rëndomtë të vendit tonë”, ka thënë Avdiaj.
Nga Ministria e Tregtisë, Industrisë dhe Ndërmarrësisë, u tha se vetëm gjatë vitit të kaluar, janë kryer mbi 2 mijë inspektime.
Kronika e realizuar nga Albiona Hajdari
