Për 13-të ditë, 24 kombëtare luajtën në fazën e grupeve për të siguruar nga një vend në fazën nokaut.
Të mërkurën mbrëma, me duelet e Grupit E dhe F, u mbyll faza e grupeve në Kampionatin Evropian “Gjermania 2024”.
16 prej 24 kombëtareve avancuan në fazën nokaut apo 1/8 e finales derisa të tjerat u kthyen në shtëpi pasi u eliminuan në grupe.
Sigurisht, nuk munguan as befasitë në fazën e grupeve pasi kombëtare si Gjeorgjia, Sllovakia, Rumania e Sllovenia do të paraqiten në fazën nokaut. 1/8 e finales në “Euro 2024” nis të shtunën pasi të enjten dhe premten nuk do të ketë ndeshje.
E duelet në 1/8 e finales do të jetë tejet interesante, ku tetë kombëtare do të avancojnë në çerekfinale të Evropianit. Për katër ditë rresht, të shtunën, dielën, hënën dhe martën do të luhen nga dy ndeshje të 1/8 së finales, ku edhe do të përcaktohen skuadrat çerekfinaliste.
1/8 e finales e hapin dy përballje interesante, të cilat do të luhen të shtunën. Prej orës 18:00 në Berlin do të përballen Zvicra dhe Italia kurse nga ora 21:00 do të luajnë Gjermania e Danimarka, ndeshje kjo që zhvillohet në Dortmund. Angli – Sllovaki dhe Spanjë – Gjeorgji, janë ndeshjet që do të luhen të dielën prej orës 18:00, përkatësisht 21:00.
Padyshim se një nga ndeshjet më interesante të kësaj faze do të jetë ajo ndërmjet Francës dhe Belgjikës që luhet të hënën prej orës 18:00, ndërsa në të njëjtën ditë por nga ora 21:00 do të takohen Portugalia dhe Sllovenia.
Kjo fazë do të mbyllet të martën me ndeshjet Rumani – Holandë dhe Austri – Turqi, që gjithashtu do të jenë interesante sikurse të gjitha duelet tjera të 1/8 së finales.
