U tmerrova, tha, por kur e pashë e kur ju dëgjova juve e gjithë të tjerët që çka po ndodh, bashkë me motrën vendosa: dua ta fali gjakun e vëllaut. E humba vëllaun e vetëm por gjeta 1, 10, 100, 1000, 1 milion vëllezër dhe motra, e gjeta në popullin tim vëllaun tim të ndjerë.
Pajtimi i gjaqeve, një mision që po drejtohej nga Anton Çetta, po mbështetej edhe nga të gjithë prijësit fetar të asaj kohe. Don Lush Gjergji nga Kisha Katolike thotë se aspekti shpirtëror kishte rëndësi të veçantë që njerëzit të bindeshin të falnin, ndonëse sipas tij Serbia përpiqej edhe në ato rrethana të përçante shqiptarët edhe në baza fetare.
Njeriu që beson në Zotin ai e ka më lehtë t’i përballojë vështirësitë dhe thotë Zoti ka dashtë, u bëftë vullneti i tij, nëse Zoti lyp këtë gjë, unë do ta bëj. Kur ishte edhe fetarja, edhe kombëtarja bashkë, atëhere ishte një simfoni, ishte një harmoni dhe me pak fjalë njerëzit bindeshin.
Se besimi në Zot i ndihmoi njerëzit që të vendosnin më lehtë për të falur asokohe, mendon edhe imami Xhevat Kryeziu.
Zoti e do faljen, Zoti e do pajtimin, Zoti e do atë që pendohet, Zoti e do dorën e pajtimit dhe janë këto vlera që i madhi Zot i vlerëson dhe i lartëson. Prandaj gjatë ligjeratave tona kemi arrit që me ua mbjell zemrën besimtarëve tanë që Zoti e do faljen. Është vepër e Zotit që Zoti e shpërblen atë që fal edhe me pa dyshim ka m’u shpërbly.
Kryeziu tregon një rast kur në një bisedë informative, agjentët e UDBA-s serbe i kishin thënë se ishte i ndaluar bashkëpunimi mes muslimanëve dhe katolikëve.
Ti, pse ke shku në kishë? Ju e keni të ndalum muslimanët me shku në kishë. Pse erdhën 20 prifta në xhaminë e Bubavecit. E kanë të ndalume ata. Pse pi boni këto sene. Ata nuk është që s’e kanë dit por i ka pengu bashkimi dhe uniteti. Se ata e kanë menu me na fut vijën e përçamjes me na nda në musliman e katolik.
Kryeziu me iniciativë vetanake ka filluar ta ndërtojë një Muze të Pajtimit të Gjaqeve,
Më shumë se një mijë e 200 gjaqe e ngatërresa u falën në tubimet publike zhvilluar mes shkurtit e majit në vitin 1990. Këto tubime organizoheshin nga këshillet e Lëvizjes Kombëtare për Pajtimin e Gjaqeve.
