Gjykata Themelore në Prishtinë ka shpallur vendimin ndaj të akuzuarve Ardijan Gjuraj, Ergim Syla, Nehrudin Skenderi dhe Mentor Bellaqa të cilët në dhjetor u shpallën fajtor për terrorizëm, shkruan teve1.info
Sipas aktgjykimit, i akuzuari Gjuraj për veprën penale “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës” u dënua me 5 vite burgim. I njëjti për veprën penale në bashkëkryerje të armëmbajtjes pa leje, u dënua me 4 vite e 6 muaj burgim. Ndaj Gjurajt, gjykata shpalli dënim unik me 9 vite burgim.
I akuzuari Ergim Syla për veprën penale “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës” u dënua me 4 vite burgim. Për veprën penale armëmbajtje pa leje në bashkëkryerje, u dënua me 3 vite e 6 muaj burigm. Ndaj tij, gjykata shpalli dënim unik me 6 vite e 6 muaj burgim.
Kurse, i akuzuari Nehrudin Skenderi për veprën penale “Lehtësimi dhe Financimi në kryerjen e terrorizmit” u dënua me 8 vite e 6 muaj burgim dhe 5 mijë euro gjobë. Nëse i akuzuari nuk mundet ose nuk dëshiron ta paguajë dënimin me gjobë, i njëjti i zëvendësohet me dënim me burgim.
I akuzuari Mentor Bellaqa për veprën penale “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës”, u dënua me 4 vite burgim, kurse për armëmbajtje pa leje 3 vite e 6 muaj burgim. Ndaj Bellaqës, gjykata shpalli dënim unik me 6 vite e 6 muaj burgim.
Ndërkaq, armët që iu janë konfiskuar do të asgjësohen./teve1.info
