Gjykata Themelore në Prishtinë, i ka caktuar masën e sigurisë prej 30 ditësh paraburgimit, serbit Z.N, i dyshuar për krime lufte – dhunë seksuale ndaj popullatës civile në komunën e Vushtrrisë, gjatë vitit 1999. Për këtë nuk pranuan të deklarohen mbrojtësit e të dyshuarit, duke thënë se është çështje e ndjeshme.
Në një sallë të tillë, u soll i prangosur.
Daljen e parë para gjykatës, Z.N, i akuzuar për krime lufte, e pati një ditë pas arrestimit.
Për 70 vjeçarin u mbajt seanca për caktimin e masës së paraburgimit, e cila ishte e mbyllur për publikun.
Dyshimet e Prokurorisë Speciale, janë për veprën penale “krime lufte kundër popullatës civile “Dhunë seksuale”, të kryer gjatë vitit 1999 në komunën e Vushtrrisë.
Me t’u përfunduar kjo seancë, mbrojtësit e të dyshuarit nuk pranuan të deklarohen, nën arsyetimin se është rast i ndjeshëm.
“Gjyqtari i procedurës paraprake ka aprovuar si të bazuar kërkesën e Prokurorisë Speciale të Republikës së Kosovës për caktimin e masës së paraburgimit kundër të pandehurit Z.N dhe të njëjtit iu është caktuar masa e paraburgimit në kohëzgjatje prej një muaji. Paraburgimi është caktuar në harmoni me nenin 184 paragrafi 1 nën paragrafi 1.1 e 1.2 pika 1.2.1 dhe 1.2.2 të KPPRK-së, për shkak të dyshimit të bazuar se ka kryer veprën penale ‘Krime lufte kundër popullatës civile’”, thuhet në njoftimin e Gjykatës.
Për këtë rast, në një komunikatë të përbashkët ishin deklaruar Prokuroria Speciale dhe Policia e Kosovës.
