Gjykata Themelore në Gjakovë ka aprovuar kërkesën e Prokurorisë Themelore të Gjakovës dhe ka caktuar masën e paraburgimit prej 30 ditësh për të pandehurin D. LL., i cili dyshohet për kryerjen e veprës penale “Ngacmimi Seksual”.
Sipas kërkesës së Prokurorisë, dyshohet se D. LL., në Gjakovë, në shkollën fillore “M.K.”, ka ngacmuar seksualisht një person të mitur, duke e përfshirë në sjellje të padëshiruara verbale të natyrës seksuale, të cilat kanë cenuar dinjitetin e të dëmtuarës dhe kanë krijuar një mjedis frikësues dhe degradues për të.
Gjyqtari i procedurës paraprake, Driton Sadiku, ka vlerësuar se janë përmbushur kushtet ligjore për caktimin e masës së paraburgimit, duke theksuar se veprat penale të tilla janë të rënda dhe ekziston rreziku i përsëritjes së veprës penale, i ikjes dhe i ndikimit në prova.
I pandehuri do të mbahet në paraburgim deri më 26 prill 2025, duke filluar nga momenti i arrestimit më 27 mars 2025. Palët kanë të drejtën e ankesës ndaj këtij vendimi në Gjykatën e Apelit të Kosovës.
