Plot 30 vite ka mbushur sot Medreseja “Alauddin” në Gjilan. E për nder të kësaj ditë, medreseja kishte organizuar një program.
Salla e Medresesë “Alauddin” në Gjilan këtë të hënë ishte mbushur plot.
Kjo për nderë të 30 vjetorit të hapjes së kësaj paraleleje.
Për shënimin e këtyre tri dekadave punë, u organizua një program.
E për të treguar për historikun e shkollës, fjala iu dha drejtorit të Medresesë Fadil Hasanit.
“Viti 1994 padyshim që shënon një ngjarje të rëndësishme për rajonin e Anamoravës, konkretisht për Gjilanin, Kamenicën, Vitinë, Preshevën dhe Bujanovcin por edhe për Kumanovën dhe Kosovën në tersi. Për qytetarët e saj të komuniteti mysliman pamarre parasysh etninë pra shënon hapjen e këtij institucioni me rëndësi për zhvillimin e arsimit fetare Islam në Kosovë, hapjen e paralelë së Medresesë në Gjilan”, tha Fadil Hasani, drejtor i Medresesë “Alaudin” në Gjilan.
Madje u shfaq edhe një dokumentar për historikun e Medresesë.
Ndërsa për një fjalë rasti u ftua edhe myftiu i Kosovës, Naim Tërnava.
“Një gjë dua të them që emri Medrese vërtetë peshon shumë, është aq i pastër sa loti i syrit. Dhe, aq dashur sa shpirti që e bart njeriu vetë në vete. Andaj, jetojmë e frymojmë me emrin Medrese për një të ardhme sa më të mirë për hir të atyre që ranë për lirinë e vendit që ishin edhe medresantë dhe ishin edhe imam”, tha Tërnava.
E nga ana tjetër Komuna e Gjilanit, Alban Hyseni tregoi se mbështetja për Medresenë do të jetë e gjithmonshme.
“Jemi këtu për të përkrahur e mbështetur Medresen, në mënyrë që kjo punë e jashtëzakonshme, kjo punë shumë e mirë që bëhet në Gjilan, e besoj edhe gjithandej Kosovës, sepse po tregojnë edhe rezultatet e mësimit, mësimdhënies e testimit. Le ta vazhdojë e le të jemi mbështetje sa herë qe ka nevojë. Urime 30 vjetori i paraleles në Gjilan. Uroj që të presim edhe shumë përvjetorë bashkë:, u shpreh Hyseni.
Mbështetje e urime për shënimin e këtij përvjetori kishte edhe ministrja Arbërie Nagavci.
“Ju siguroj që mbështetjen tonë, timen si ministre e Arsimit, si Ministri e Arsimit, si Qeveri e kemi të përhershëm sikurse deri më tani në çdo fazë të procesit edukativo-arsimor në përpjekjet tona të përbashkëta për të bërë më të mirën për fëmijët tanë dhe vendit tonë. Së bashku do të ecim përpara më të fortë e më të sigurt. Urime tri dekada punë të suksesshme të paralelet këtu në Gjilan”, tha Nagavci.
Në gjithë këtë program nuk munguan as paraqitjet e medresantëve me disa pika artistike.
Në fund të këtij programi u dhuruan disa mirënjohje.
