Sipas Zemaj, mjekët po vazhdojnë të injorohen nga shteti, konkretisht nga Qeveria dhe Ministria e Shëndetësisë, shkruan teve1.info.
“Mbi 1.000 profesionistë shëndetësorë dhe staf mbështetës, të angazhuar nga Ministria e Shëndetësisë, ende nuk kanë marrë pagat e muajve Mars dhe Prill edhe pse jemi në mes të muajit Maj. Edhe përkundër faktit që gjithsecili punon me përkushtim dhe zell dhe pa asnjë benefit dhe ditë pushimi, vazhdojnë të injorohen nga shteti që nënkupton Qeveria dhe MSH”, ka shkruar Zemaj në Facebook.
Tutje ish-ministri i Shëndetësisë, Armend Zemaj është shprehur se këta profesionistë shëndetësor nuk e dinë madje as arsyen e mospagesës së tyre edhe pse sipas tij, ata kanë bërë disa herë përpjekje por ende nuk kanë marrë përgjigje zyrtare.
“Pavarësisht përpjekjeve të tyre për të mësuar arsyen e mospagesës nga ana e Ministrisë së Shëndetësisë, ende nuk kanë asnjë përgjigje zyrtare. Për të diskutuar për këtë çështje, sot, si anëtar i Komisionit për Shëndetësi, kam takuar disa nga përfaqësuesit e stafit të angazhuar si në ShSKUK po ashtu edhe në vaksinim. “Heronjtë e ditëve tona”, kanë nevojë për pagë, mirëqenie dhe respekt, fundja, është detyrim ligjor që të jepet paga për punën e kryer!”, ka shkruar Zemaj.
