Gjatë fjalimeve të gjata, ai nuk e la pa përmendur edhe luftën, por tha se kjo do ishte e rrezikshme për Serbinë.
“Derisa unë të kem ndikim, Serbia nuk do ta njohë as drejtpërdrejt, as tërthorazi pavarësinë e njëanshme të Kosovës. Nuk ka asnjë politikë që mund ta ndryshojë këtë”, tha Vuçiq.
Fjala luftë nuk mungoi në retorikën e të parit të Serbisë.
Ai tha se serbët në veri janë të gatshëm të mbrojnë veriun e Kosovës.
“Për herë të parë u shfaqen fytyra, të rinj dhe të vjetër, me uniforma të ndryshme që kërkojnë të mbrojnë veriun e Kosovës nga agresorët. Kur ata të rinj të kombësisë serbe u shfaqën pa armë, i gjithë populli, të gjitha gratë në zonat urbane, zbritën për t’i përshëndetur dhe për t’u thënë ‘Mirë se erdhe liri”, tha presidenti serb gjatë fjalimit.
Ndërsa deputeti nga Lugina e Presheves, Shaip Kamberi, ia kujtoi Presidentit serb se Kosova është shtet i pavarur e sovran.
“Vuçiq e ka përgjegjësinë më të madhe që t’u tregojë qytetarëve serbë për Kosovën “të vërtetën dhe vetëm të vërtetën, e jo dëshirat boshe dhe ambiciet politike”, tha Kamberi.
E njohësi i çështjeve politike, Belgzim Kamberi, thotë se Vuçiq assesi nuk po mund të shkëputet nga mitologjia nacionaliste serbe.
Seanca e Kuvendit të Serbisë u ndoq edhe nga anëtarë të Listës Serbe.
Kronika e realizuar nga Shpat Blakçori
