Senatori amerikan, Chris Murphy, pas takimit me kryeministrin Albin Kurti duke folur për marrëveshjen ndërmjet Kosovës dhe Serbisë ska thënë të dy palët duhet zbatuar atë.
Sipas tij, Serbia duhet të ndalojë së penguari anëtarësimin e Kosovës në organizata ndërkombëtare dhe Kosova duhet të formojë Asociacionin e komunave me shumicë serbe.
Senatori amerikan tha se kjo çështje duhet të mbyllet gjatë këtij viti.
“Patëm një bisedë të mirë dhe të sinqertë për dialogun. Serbia duhet të ndalojë të mos pengoj Kosovën në anëtarësimin në organizata ndërkombëtare dhe mendojmë se është e kuptueshme që të lejohet që komunat me shumicë serbe të kenë njëfarë mundësie për të bashkërenditur shërbimet që ju ofrojnë. Por koha ka shumë rëndësi, është viti kur duhet të kryhet kjo çështje dhe që të mundësohet lëvizja drejt normalizimit dhe që do të qojë tek njohja e ndërsjellë”, tha ai në konferencën për media së bashku me Kurtin, raporton teve1.info.
Murphy tha se Kosova ka bërë progres në sektorin e ekonomisë dhe në ruajtjen e rendit dhe ligjit, duke shprehur falënderim për luftimin e korrupsionit.
Ai vlerësoi raportet ndërmjet Kosovës dhe SHBA-së,duke thënë se ata nuk kanë mik më të mirë se Kosovën në rajon.
Kurse senatori Gary Peters shtoi se zbatimi i marrëveshjes me Serbinë, është një prej faktorëve kyç për të ecur përpara.
“Duhet të ketë një qartësi lidhur me atë se çka po ndodh me Serbinë dhe rrjedhimisht ne jemi të inkurajuar nga marrëveshja e cila është arritur dhe zbatimi është një prej faktorëve kyç për të shkuar përpara dhe ne biseduam gjerësisht për atë”, ka thënë Peters.
Peters tutje shtoi se marrëdhëniet Kosovë-ShBA janë të shkëlqyeshme edhe në mes të ushtrive teksa përmendi pjesëmarrjen e përbashkët në ushtrimin fushor ‘Mbrojtësi i Evropës”.
“Sa i përket gjithashtu edhe marrëdhënieve ndërmjet forcave të armatosura, nuk ka asnjë dyshim që ka marrëdhënie të shkëlqyeshme mes ShBA-së dhe Kosovës dhe çfarëdo incidenti ndërkombëtar që ka nevojë që aleatët të bashkohen dhe vendi i juaj e ngrit dorën. Dhe jeni ndër të parët nëse jo i pari që e ngritni dorën për të punuar me forcat e armatosura të ShBA-së”.
“Nuk është kurrfarë befasie që jeni ndër partnerët kryesorë sa i përket ushtrimit fushor ‘Mbrojtësi i Evropës’. Dhe mirëpresim mundësinë për të punuar bashkërisht me juve. E dimë që janë të gjitha ato njësitet, veçanërisht në kërkim-shpëtim të cilat janë të famshme dhe na vjen shumë mirë që keni mundësi që të merrni pjesë në operacione kur ka kriza dhe të shkoni kudo që ka nevojë nëpër botë”, ka deklaruar amerikani