Transmetuesi publik (RTK), nuk u ka vazhduar kontratën e punës disa punëtorëve të mediumit të cilët ishin në kontratë mbi vepër.
Në mesin e tyre që nuk i është vazhduar kontrata, janë edhe disa gra lehona, raporton teve1.info.
Në një komunikatë të Bordit të RTK-së thuhet se “Bordi i RTK-së në mbledhjen e datës 12 Mars 2022 ka aprovuar rekomandimet e Komisionit të Skemës Programore për skemën programore të RTK-së për vitin 2022.
Bordi i RTK-së, ka kërkuar nga menaxhmenti që t’i inkorporojë rekomandimet në skemën programore që pritet të vijë për aprovim në bord në mbledhjen e radhës”, thuhet në komunikatë.
Poashtu vendet vakante thuhet se do të mbulohen nga stafi i brendshëm. Po ashtu është paralajmëruar se do të hapët një konkurs për disa pozita të rregullta.
Komunikata e plotë:
Bordi i RTK-së në mbledhjen e datës 12 Mars 2022 ka aprovuar rekomandimet e Komisionit të Skemës Programore për skemën programore të RTK-së për vitin 2022. Bordi i RTK-së ka kërkuar nga menaxhmenti që t’i inkorporojë rekomandimet në skemën programore që pritet të vijë për aprovim në bord në mbledhjen e radhës.
Bordi ka diskutuar propozimet e Njësisë së Auditimit të Brendshëm për ndryshimet e mundshme në statut dhe në rregullore. Në këtë mbledhje ishte i pranishëm z. Shkumbin Ahmetxhekaj, U.D Drejtor i Përgjithshëm i RTK-së dhe në pjesën e dedikuar për marketingun i pranishëm ishte edhe Arian Sahiti, drejtori i departamentit të Marketingut.
Bordi ka diskutuar për gjendjen e departamentit të marketingut në RTK dhe ka shqyrtuar mundësitë për ta fuqizuar këtë departament, të cilin e konsideron shumë të rëndësishëm për gjenerimin e të hyrave financiare.
Në këtë mbledhje z. Ahmetxhekaj raportoi për risistemimin e punonjësve brenda mediumit publik. Risistemimi në këtë fazë është bërë duke pasur për bazë faktin se me datën 31 mars të këtij viti përfundojnë të gjitha kontratat për shërbime dhe vendet që do të mbesin vakante, do të plotësohen nga stafi i brendshëm që kanë kontrata të rregullta.
Z.Ahmetxhekaj ka raportuar se gjatë procesit të risistemimit, komisioni për risistemim ka ardhur në përfundim se është i domosdoshëm rekrutimi i disa punëtorëve, pozita të cilat nuk ka qenë e mundur të mbulohen me stafin aktual të brendshëm, pas mbarimit të kontratave me shërbime.
U.d drejtori ka propozuar hapjen e konkursit për 12 pozita të punës në disa njësi ndryshme të RTK-së. Bordi i RTK-së ka aprovuar tetë prej tyre. Rrjedhimisht do të ketë konkurs publik për punësimin e punëtorëve të rregullt në pozitat si vijon, një (1) videoreporter/korrespodent në Tiranë, një (1) gazetar/korrespodent në Mal të Zi, një (1) gazetar/korrespodent në Serbi/Preshevë, një korrespondent/gazetar për rajonin e Prizrenit, një gazetar për redaksinë boshnjake në Radio Kosova dhe dy shoferë.
