Një projektligj për Agjencinë për Menaxhimin e Emergjencave është vënë në konsultime publike.
Por nuk mungojnë kritikat për të.
Si i mangët në përmbajtje po vlerësohet ky draft ligj.
“Një vërejtje tek përkufizimet. Nuk paraqiten partnerët, as komunat, as niveli lokal ose dytësor, që e kanë rolin e vet në emergjenca, në mos rolin kryesor gjatë praktikës. Ndërkohë, në asnjë nen nuk vërehet asnjë bashkëpunim ose integrim ose orientim në Bashkimin Evropian ose Agjencinë Evropiane ose rrjetet më të cilat bashkëpunojnë”, vlerëson Ilir Morina, ish-kryeshef i Agjencionit për Mbrojtjen e Mjedisit.
Vërejtje pati edhe për buxhetin e Agjencisë.
“Të mos shkojnë të gjitha të hyrat të koncentruara në Ministrinë e Financave. Disa të hyra me përqindje t’i kenë edhe ata, në mënyrë që pajisjet elementare, mjetet e veta, t’i blejnë pa e pyetur ministrin e Financave apo Parlamentin. Sepse shpeshherë për shkak të buxhetit të limituar të shtetit, shembull 3 miliardë euro, nuk u vie radha shumë agjencive që të implementojnë politika bazike”, shprehet Morina.
Zjarrfikësit janë njëra prej kategorive të përfshira në menaxhim emergjent.
Por edhe këta, kanë kritika për paqartësitë administrative me të cilat përballen.
“Zjarrfikësit janë staf i ministrisë së Punëve të Brendshme, menaxhohen nga agjencia, që e nënkupton Agjencinë për Menaxhimin e Emergjencave, në koordinim dhe bashkëpunim me komunat. Janë bartë të gjitha asetet, personeli e pajisjet në AME, kurse pagat dhe shtesat mbi pagën bazë kanë mbetur në nivelin lokal. Pra, nuk kanë mundur që mjetet buxhetore të bartën nga niveli lokal në nivelin qendror. Kërkesa jonë e vazhdueshme ka qenë që të dihet se ku e kemi adresën e saktë, ku i kemi edhe pagat edhe investimet kapitale, pra gjithçka që ka të bëjë me një punëdhënës. E jo kështu”, ka thënë Malë Gashi, komandant i zjarrfikësve.
Ligji për Zjarrfikësit, pritet që së shpejti të pësojë ndryshime ku do të adresohet edhe kjo çështje.
