Presidentja e Kosovës, Vjosa Osmani, ka zhvilluar takim me mbretin e Jordanisë, Abdullahu II
Osmani ka njoftuar se në këtë takim është diskutuar për marrëdhëniet ndërmjet dy vendeve dhe avancimin e tyre.
Në këtë kontekst, Presidentja Osmani ka shtruar nevojën e mbështetjes së mëtejme nga Mbretëria e Jordanisë në përpjekjet e Kosovës për të siguruar anëtarësime në organizata ndërkombëtare dhe njohje nga vendet arabe.
Presidentja Osmani dhe Mbreti Adullah II, diskutuan për situatën aktuale në Kosovë dhe rajon, ndërkohë që të dy palët riafirmuan përkushtimin për paqe e stabilitet.
Sipas Presidentes Osmani, ndërmjet të dy shteteve ka potencial për bashkëpunimin në fushën e mbrojtjes. Në këtë kontekst, ajo përmendi faktin se një ekip ushtarësh jordanezë janë trajnuar së fundmi në qendrën tonë të trajnimit të Kërkimit dhe Shpëtimit.
Më tej, Presidentja Osmani, tha se Kosova është e interesuar të zhvillojë marrëdhënie të ngushta me Jordaninë në fusha me interes të ndërsjellë, si ekonomia, tregtia, mbrojtja, kultura, arsimi dhe turizmi. Të dy liderët shprehën optimizmin për të ardhmen e bashkëpunimit ndërmjet dy shteteve.
Takimi është zhvilluar në New York ku do të mbahet sesionit të 78-të të Asamblesë së Kombeve të Bashkuara.
Osmani përmes një video nga atje, ka thënë se sonte do të zhvillojë disa takime, ku ka thënë se më i rëndësishmi është ai i pritjes nga presidenti i SHBA-së, Joe Biden, të cilin ka thënë se do ta falënderoj për mbështetjen e vazhdueshme.
“Është shumë me rëndësi që të kemi mundësi të marrim pjesë në organizime bashkë me liderët tjerë botërorë. Më e rëndësishmja do të jetë pritja nga presidenti Biden, ku do të kem mundësi ta falënderoj në emër të popullit të Kosovës për aleancën tonë dhe mbështetjen e vazhdueshme të SHBA-së”, është shprehur Osmani.
Ajo ka njoftuar se do të ketë edhe takime me mërgatën./teve1.info/
