Inspektorati i Policisë së Kosovës, ka konfirmuar se një pjesëtar i Policisë së Kosovës ka plagosur një 16- vjeçar me armë zjarr në fshatin Dubravë të Istogut.
Sipas IPK-së, rasti ka ndodhur në shtëpinë e policit pas mesnatës dhe sipas hetimeve të para bëhet fjalë për një plagosje aksidentale.
IPK ka bërë të ditur se polici është arrestuar dhe me vendim të prokurorit është ndaluar 48 – orë.
“Bazuar në hetimet preliminare fillestare dyshohet se rasti ka ndodhur në shtëpinë e zyrtarit policor i cili deri në këtë fazë të hetimit dyshohet se aksidentalisht ka shkrepur armën zyrtare. Personi i dyshuar në këtë rast (zyrtari policor) është arrestuar nga Inspektorati Policor me dyshimin se i njëjti ka kryer veprën penale “vrasje e mbetur në tentativë” kurse me vendim të prokurorit të njëjtit i është caktuar masa e ndalimit për 48 orë si dhe është suspenduar nga detyra”, thuhet në komunikatën e IPK-së.
Bëhet e ditur se i plagosuri ka lidhje familjare me policin.
16 – vjeçari i plagosur është duke u trajtuar në Klinikën Emergjente në ShSKUK
Nga emergjenca kanë thënë për teve1.info se i plagosuri është në gjendje të rëndë.
