Në një rrëfim për vëllaun e saj të zhdukur që nga lufta e fundit në Kosovë, ajo thotë se do të pajtohet me faktin se ai nuk është gjallë vetëm kur t’i ofrohen faktet e duhura.
“Po ende mendoj se është gjallë, veç që s’kam argumente unë mendoj se është gjallë, ata le të ma ofrojnë argumentin se nuk është në mesin tonë, unë nuk jam budallë mos me pranu edhe pse nuk ju besoj asnjëherë sepse unë e kam ditur peshën dhe rëndësinë e Ukshinit në shoqëri dhe serbët e kanë ditë sa vlen e sa s’vlen edhe nëse e kanë ruajtur diku e kanë ruajtur për interesa të veta për me shfyrtëzu inteligjencën e tij. Ka qenë njeri që ka njoftur marrëdhëniet lindje-perëndim ka lënë libër shkrime edhe ka qenë njeri ndërkombëtar edhe nëse e kanë ruajtur besoj që e kanë ruajtur për interesa të veta”, tha ajo.
E ftuar në “Info Nata” në Tëvë 1, Myrvete Hoti – Kosumi ka treguar edhe për kohën kur Hoti ishte i burgosur politikisht për shkak se mbronte kauzat kombëtare.
“Ka pasur në 1981-ën kur i ka mbrojtë protestat në atë kohë i vetmi prej intelektualëve që ka mbrojtë tezën ‘Kosova Republikë’ në kuadër të Jugosllavisë e ka elaboru në mënyrë shkencore që na takon si popull edhe sa i përket popullsisë publikisht në vend se me u distancu sepse përpara bëhej diferencimi i njerëzve prej protestueve përkundrazi e ka elaboru çështjen dhe për atë e kanë marrë në burg 9 vjet kanë dënu”, tha ajo.
Madje, Myrvete Hoti – Kosumi ka treguar edhe për letrat që i shkëmbenin gjatë kohës sa ai ishte në burg, teksa e kujton me mallëngjim një nga letrat që ia kishte dërguar ai.
“Për mua letrat gjithmonë kanë qenë të rënda, ai ka qenë i fortë, stoik ka qenë unë e kam përjetuar rëndë çdo letër e kam larë me lot. P.sh letrën e parë e ka përshkru burgun në Nish sa ka qenë atje ka qepur me makinë edhe makina e qepjes e ka një papuqe si kjo e veturës dhe e ka krahasu tash punën e tij me makinë sikur rrugëtimin e tij bile shkruan shumë mirë që më kujtohet sot: ‘mbërrina në Evropë por në Prishtinë paksa me gurë e gropa rruga gjarpërore e s’po mundem me mbërri ende’. Më ka dhënë shumë mirë të nënkuptoj se çka ka desht me thënë me atë. Fëmijët gjithmonë në çdo letër e ka pasur në fund kujdes fëmijtë të mi kesh, ka qenë i çmendur për ta, gjithmonë më ka folur për ta me u kujdes sepse Andini vazhdimisht ka qenë në vizitë e motra e tij njëherë ka qenë”, rrëfeu ajo.
Ndërkaq, ajo ka treguar edhe për librat e tij që i posedon për të cilat thotë se “vetëm kur i sheh mërzitet dhe nuk mund t’i lexojë”./teve1.info/
