Këto deklarata ai i ka bërë në një konferencë për media në Samitin Digjital për Ballkanin Perëndimor që po mbahet në Prishtinë.
“Me këtë rast ne konfirmojmë gatishmërinë tonë për ta forcuar edhe bashkëpunimin rajonal por edhe digjitalizimin si një proces tejet i rëndësishëm për të gjitha fushat e jetës dhe të veprimtarisë. Digjitalizimi e ngrit cilësinë e shërbimeve pastaj llogaridhënien e zyrtarëve dhe trasnparencën e proceseve në administratën publike por padyshim edhe në industri, në ndërmarrësi, në edukim, në shëndetësi etj.”, tha ai.
Tutje, Kurti bëri të ditur se diskutimet gjatë këtij Samiti do të përqendrohen kryesisht edhe në sigurinë kibernetike që sipas tij, duhet sjellë qëndrueshmëri institucionale karshi sulmeve të ndryshme.
“Diskutimet të cilat do të jenë në kaudër të agjendës së përbashkët do të përqendrohen te infrastruktura siç janë fibrat optike dhe teknologjia 5G, pastaj aftësisë kapaciteteve digjitale për një forcëm fuqi punëtore e cila është e edukuar për sfidat e ekonomisë në të ardhmen që gjithnjë e më shumë do të jetë e digjitalizuar. Pastaj siguria kibernetike e cila duhet të sjellë qëndrueshmëri kibernetike të institucioneve, bizneseve, shtetit në përgjithësi karshi sulmeve të ndryshme. Dhe e fundit është krijimi i një ambienti të favorshëm dhe konkurrues për bizneset inovative”, tha ai.
Ndryshe, në këtë Samit po marrin pjesë më shumë se 200 biznese, do të ketë më shumë se 60 folës dhe mbi 30 organizata joqeveritare në gjithsejt nëntë panele e 16 ngjarje anësore ku pjesëmarrës janë të gjitha grupmoshat nga Kosova, rajoni, Bashkimi Evropian dhe Shtetet e Bashkuara të Amerikës./teve1.info/
