Përmes një postimi në Facebook, Krasniqi iu drejtua kryeministrit duke i thënë të mos mbajë inat ndaj grevistëve, pasi që këta të fundit kanë zgjedhur në krye të tyre Rrahman Jasharajn, teksa qytetarët kanë zgjedhur atë për kryeministër.
“Kryeministër, ofroje kompromisin e mos mbaj inat ndaj protagonistëve, sepse mësimdhënësit e kanë zgjedhur Rrahman Jasharin, por qytetarët të kanë zgjedhur ty. Sot, janë qytetarët dhe fëmijët tanë, ata që janë më të dëmtuarit nga varësia jote për t’u treguar i fortë përballë sindikalistëve. E kjo nuk i takon një kryeministri. Nuk është cilësia jote si person, por premtimet tua ato që të kanë sjellë në pushtet. Nuk ka nevojë të jesh vëlla me askënd, por duhet të jesh kryeministër i përgjegjshëm për të gjithë. Prandaj, gjej rrugë dhe zhblloko situatën”, thuhet ndër tjerash në postim.
Sipas Krasniqit, pas mbledhjes mes Kurtit e Këshillit Grevist të martën është dashur të ketë marrëveshje sepse “dëmin e mosmarrëveshjes e kemi parë tashmë 13 ditë”.
“Burrështetasit nga pushtetarët i ndanë mënyra se si e shohin karakterin e qeverisjes. Për të parët, pushteti është marrëdhënie e qeveritarëve me të qeverisurit. Për të dytët, është pronësi mbi të qeverisurit. Ti Kryeministër, dialogun me sindikatat e ke nisur mbrapshtë dhe je duke e ushqyer mbrapshtë, tamam si një pushtetar, larg çdo cilësie të një burrështetasi. Sot është dashur të ketë marrëveshje, sepse dëmin e mosmarrëveshjes e kemi parë tashmë e 13 ditë. Por, marrëveshje nuk ka as sot sepse nuk mund të ketë rezultat kur nuk ka konsideratë e as vullnet për të gjetur zgjidhje. Ndërsa familjeve, prindërve, e më së shumti fëmijëve, ju duhet zgjidhja e jo bllokada”, tha ndër tjerash ai.
Po ashtu, i pari i PDK-së vlerëson se aktualisht nuk ka përgjegjësi më të madhe dhe as agjendë më të rëndësishme për kryeministrin sesa nxënësit të fillojnë vitin e ri shkollor.
“Fëmijët duhet të kthehen në shkollë me urgjencë! Nuk ka përgjegjësi më të madhe sot dhe as agjendë më të rëndësishme për ty si kryeministër i vendit, sesa ta rimendosh e të veprosh siç kërkon arsyeja e shëndoshë, që nesër nxënësit e mësimdhënësit të nisin rrugëtimin e vitit të ri shkollor. Fëmijët vijnë të parët, të tjerat pas tyre. Për të tjerat mund të të mirëkuptojmë. Për fëmijët s’mund të ta falim këtë arrogancë”, shtoi ndër tjerash Krasniqi./teve1.info/
