Ky dokument pritet që javën e ardhshme të diskutohet në Komisionin parlamentar për Siguri.
Kjo strategji, në nivelin global përmend rrezikun nga zgjerimi eventual i konfliktit në Ukrainë, ndërsa në rrafshin rajonal ngre shqetësimin për destabilizim të Ballkanit nga ana e Serbisë. Madje, rrezikun nga shteti serb, ky dokument-strategji, e cilëson si kërcënimin kryesor për Kosovën.
Tutje në këtë strategji që pritet ta përcjell Kosovën në pesë vitet e ardhshme, janë paraqitur edhe interesat strategjike të vendit, në kuadër të së cilës janë listuar:
– Mbrojtja e sovranitetit dhe integritetit territorial
– Ruajtja e rendit kushtetues dhe siguria publike
– Siguria njerëzore dhe zhvillimi shoqëror
– Integrimi në strukturat euro – atlantike dhe mekanizmat e tjerë ndërkombëtarë (faqe 11).
Në këtë kapitull të dytë thuhet se Kosova synon të ndaj 2% të Bruto Produktit Vendor për mbrojtjen e po ashtu parashihet edhe fillimi i shërbimit ushtarak të detyrueshëm si dhe forcimi i kapaciteteve te Policisë.
Në një nënkapitull, ku flitet për luftimin e korrupsionit, përmendet edhe krijimi i Byros shtetërore për Konfiskimin e Pasurisë së pajustifikueshme.
Në kapitullin ku trajtohet strategjia për avancimin drejtë mekanizmave ndërkombëtarë, janë të listuar ato që tani më janë edhe deklarime publike të institucioneve të Kosovës, si aspirata për anëtarësim në NATO, aplikimi për marrjen statusit të vendit kandidat e po ashtu edhe intensifikimi i lobimit me vendet skeptike për çështjen e liberalizimit të vizave.
Kronika e realizuar nga Valmir Gallopeni
