Qeveria e Kosovës në mbledhjen e djeshme e ka miratuar Projektligjin që rregullon çmimet e produkteve medicinale.
Në mbledhjen e ekzekutivit ministri i Shëndetësisë, Arben Vitia theksoi se tash e tutje çmimet e barnave do të jenë të njëjta në çdo barnatore dhe do të ketë nivelizim të çmimit të tyre.
Këtë vendim e ka mirëpritur farmacistja Laureta Berisha – Kosumi.
Berisha – Kosumi në emisionin “Herët” në Tëvë1, tha se me këtë vendim ajo çka do të vlerësohet te farmacistët do të jetë profesionalizmi dhe puna e tyre e jo çmimi i barnave.
“Është dita e parë që ndoshta ndihem shumë profesionale në vendin tim të punës meqenëse pacientët shumë shpejtë do të kenë mundësinë që ta kenë çmimin e njëjtë të barit në çdo barnatore dhe ajo çka do të vlerësojnë te një farmacist do të jetë puna dhe profesionalizmi i tij. Shtuar kësaj që pacientët nuk do të jenë më të detyruar të ndjekin ato barnatore që kanë çmimet më të lira në treg, mirëpo do të kenë mundësinë t’i blejnë barnat në barnatoren më të afërt dhe aty ku ndihen më të sigurtë, me ofrimin e shërbimeve profesionale nga farmacistët”, tha ajo.
Tutje ajo në Tëvë1, tha se ka pasur raste kur pacientët kanë kërkuar sqarime nga farmacistët për barna dhe në fund të njëjtit kanë vazhduar në barnatore të tjera për të parë nëse çmimi është më i ulët.
“Them të drejtën ka qenë shqetësim kryesor sepse ka ndodh që gjysmë ore jam marrë me një pacientë dhe ja ke sqaru barnat dhe në fund nuk i ka pas të hollat e mjaftueshme, ose ka thënë se po shikoj edhe në barnatore tjera mos është çmimi më i lirë. Pra në këtë rast ne jemi të lumtur që do të vije në pah profesionalizmi jonë dhe pacientët do të kenë mundësi të mos i shikojnë më çmimet, sepse do ta kenë çmimin e njëjtë në të gjitha barnatoret. Pak është shqetësuese çmimi i suplimenteve që gjithmonë do të jetë i ndryshëm, mirëpo edhe me kohë pacientët tanë do të mësohen që mund te marrin dhe suplimente më të lira ato të cilat ua kryejnë funksionin e njëjtë dhe jo detyrimisht të marrin suplimente të tjera”, tha ajo.
Ndryshe kryeministri Albin Kurti, tha se ky Projektligj mundëson që të vendosin çmime tavan dhe të unifikuara për ilaçet.
Sipas tij, barnat duhet të jenë edhe të disponueshme edhe të përballueshme./teve1.info./
