Njëra nga synimet e kësaj strategjie është kryerja shërbimit ushtarak të detyrueshëm. Por, Elezi tha se kjo çështje më shumë i takon të kaluarës, pasi që sipas tij, në Evropë dhe në vendet demokratike nuk ka ushtri të detyrueshme.
“Çështja në fjalë e ushtrisë së detyrueshme apo shërbimit ushtarak të detyrueshëm më shumë i takon të kaluarës sepse ne jemi të vetëdijshëm që tani në Evropë apo në vendet që aspirojnë demokracinë nuk ka ushtri të detyrueshme, ndoshta në këtë rast është munduar që të forcojë pozicionin e Kosovës karshi rreziqeve që mund t’i vijnë si rezultat i tentimeve apo dëshirave të shteteve përreth të cilat në vazhdimësi bëjnë përpjekje për cenimin e sigurisë”, tha ai.
Tutje në emisionin “Ditari”, Elezi theksoi se shërbimi ushtarak jo i detyruar do të sillte profesionalizëm krahas shërbimit profesional ushtarak i cili thotë se bëhet përmes punësimit apo përmes krijimit të vendeve të punës për pjesëtarët e saj.
“Meqë pretendojmë që në të ardhmen ushtria e Kosovës të jetë pjesë e NATO-s duhet të veprojmë krahas shteteve që kanë fuqi të veçanta në NATO dhe kanë programe koherente sa i përket shërbimit ushtarak”, deklaroi ai.
Më tej njohësi i sigurisë tha se në këtë strategji është dashur të ketë më shumë ekspertë të fushave dhe që strategjia të harmonizohet me veprimet e shteteve evropiane të cilët kanë për qëllim rritjen e demokracisë.
Ndërkohë me 60 vota për, një abstenim dhe asnjë kundër nga 84 deputetë sa ishin të pranishëm në sallë sot është miratuar në lexim të parë draft-strategjia e sigurisë për Kosovën 2022-2027 e propozuar nga Qeveria e Kosovës./Teve1.info/
https://teve1.info/lajmet/2miratohet-strategjia-per-sigurine/
