Zëvendësministri i Punëve të Brendshme, Bardhyl Dobra ka thënë se Ligji për Paga do të hyjë në fuqi më 5 shkurt.
Dobra ka shtuar se për këtë ligj është punuar në mënyrë intensive.
“Nga fundi i muajit dhjetor e deri në këtë javë është punuar në mënyrë intensive nga MpB dhe institucionet tjera për të finalizuar klasifikimin e pozitave dhe bashkërisht për finalizimin e rregulloreve të ndryshme”, ka thënë Dobra në një konferencë për media..
Dobra ka shtuar se klasifikimi i pozitave ka dështuar disa herë në të kaluarën, e njërën prej arsyeve ai ka përmendur parregullsitë që kanë detektuar.
Madje sipas tij ka pasur pozitë “Zyrtar për fotokopje”.
“Klasifikimi i pozitave është hera e parë që po bëhet në Kosovë, përkundër dy apo tre tentativave të mëhershme, ai çdoherë ka dështuar”, transmeton teve1.info.
“Duke parë vështirësitë dhe keqpërdorimet e mëdha, tani e kemi kuptuar pse ka dështuar disa herë ky klasifikim. Kemi parë terma të ndryshëm që janë përdorur por pozitën e njëtë, terma të ndryshëm në gjuhën angëleze për pozitën e njëjtë, kemi hasur në pozitën e famshme “Zyrtar për fotokopje” në mënyrë institucionale e kemi gjetur nëpër tabele, kemi juristë të emëruar si drejtorë të QKMF e shumë të tjera”, ka shtuar ai.
“Ky klasifikim do të mbikëqyret me kudjes dhe do të korrigjohen gabimet potenciale që kanë mundur të ndodhin. Mos të harrojmë që janë mbi 80 mijë zyrtarë që është dashtur të verifikohen rresht për rresht nga zyrtarët dhe ekspertët e angazhuar”, ka shtuar ai.
