Sekretari amerikan i shtetit, Antony Blinken e ka uruar Serbinë me rastin e Ditës Kombëtare të Serbisë. Blinken tha se SHBA-ja “vlerëson partneritetin strategjik” me Serbinë teksa duke folur për rolin e SHBA-së në Ballkanin Perëndimor, Blinken përcolli se administrata e Biden është një “mbështetëse e fortë” e ambicieve të Serbisë për t’u anëtarësuar në BE.
“Ne jemi të përkushtuar të punojmë me ju dhe partnerët tanë të BE-së drejt këtij qëllimi të rëndësishëm. E mirëprita angazhimin konstruktiv të Serbisë me zyrtarët e SHBA-së, BE-së, Francës, Gjermanisë dhe Italisë gjatë një vizite të fundit në Beograd”, tha Blinken, transmeton teve1.info.
Diplomati i lartë amerikan shprehu besimin në rezultatet pozitive të marrëveshjes franko-gjermane midis Kosovës dhe Serbisë.
“Kam besim se normalizimi i marrëdhënieve ndërmjet Serbisë dhe Kosovës do të sjellë siguri dhe prosperitet për Serbinë dhe të gjithë qytetarët e Ballkanit Perëndimor”, tha Blinken.
Përderisa ai pranoi “kompromiset e vështira” që presidenti serb Vuçiq dhe kryeministri Albin Kurti do të duhet bëjnë, Blinken tha se “shpërblimet për popullin serb – dhe gjithë rajonin – do të jenë të mëdha”, shkruan The Pavlovic Today.
Blinken i bëri thirrje Serbisë të mbështesë Ukrainën dhe ai mirëpriti mesazhet serbe të mbështetjes për vendin e shkatërruar nga lufta, të shprehura në Kombet e Bashkuara.
