Barnat e skaduara janë grumbulluar në stok.
E për asgjësimin e tyre po pritet tash e tre muaj.
Ministria e Shëndetësisë ka thënë se për këtë kanë ofertuar dy operatorë ekonomikë
“Ky aktivitet i prokurimit ka qene vlere e mesme, procedurë e hapur dhe kane ofertuar gjithsejtë dy (2) Operator Ekonomik”
Mirëpo nëpër njësitë shëndetësore të burgjeve, tash e disa herë tenderi për asgjësimin e barnave po rihapet.
Kjo për shkak të ankesave të vazhdueshme që po bëhen nga operatorët si dhe refuzimit të tyre nga ana e OSHP-së.
Mirëpo mos-shkatërrimin e barnave me afat të skaduar e sheh të rrezikshme njohësi i shëndetësisë, Bujar Vitija.
“Pothuajse kemi të mbuluara të gjitha institucionet publike me barna pa afat dhe kjo sigurisht se e rrezikon jo vetëm ndoshta sigurinë e barnave të cilat kanë afat sepse zakonisht janë në të njejtat depo por rrezikon edhe shëndetin e zyrtarëve në këtë rast të punonjësve të burgut apo vet të burgosurve që janë në ato institucione”, thotë Vitija.
E sipas anëtarit të Komisionit për Shëndetësi, Shemsedin Dreshaj, kjo qeveri nuk po përmirëson aspak gjendjen në këtë drejtim.
“Ne si opozitë nuk jemi të kënaqur me cilësinë e shkatërrimit të tyre por realisht nuk është duke u punuar më keq së në qeverisjet paraprake. Pa ndonjë përmirësim por me një veçori tjetër të mungesës së transparencës lidhur me veprimet të cilat bëhen brenda për brenda qeverisë”, thotë deputeti Dreshaj.
Tenderi për asgjësimin e barnave me afat të skaduar në njësitë shëndetësore të burgjeve u hap në mars të këtij viti, për t’u mbyllur e rihapur për të disatën herë.
