Koordinatori dhe analisti ligjor nga Fondi për të Drejtën Humanitare, Amer Alija, ka thënë se dokumentimi i krimeve të luftës së fundit në Kosovës më shumë është bërë nga organizatat joqeveritare, se nga shteti i Kosovës.
Alija ka bërë të ditur se Fondi për të Drejtat Humanitare, i ka dokumentuar të gjitha viktimat e luftës.
“Dokumentimi i krimeve të luftës më shumë është bërë nga organizatat qeveritare, kemi Fondin për të Drejtat Humanitare, e cila është duke dokumentar luftën e Kosovës, dhe viktimat të cilat janë vrarë gjatë luftës, pra i ka dokumentuar të gjitha viktimat, po ashtu e kemi organizatën KMDLNj, e cila ka bërë dokumentimin janë edhe disa shoqata në nivel lokal të cilat kanë bërë dokumentimin e krimeve të cilat kanë ndodhur në zonat ku ata kanë vepruar”, ka thënë ai në emisionin “Info Nata” në Tëvë1.
Alija ka thënë se shteti i Kosovës nuk ka dokumentim zyrtar për krimet e luftës.
“Fatkeqësisht, nuk kemi ndonjë dokumentim zyrtarë nga shteti i Kosovës.Ka qenë një institut për krimet e luftës në kuadër të Ministrisë së Drejtësisë, i cili ka qenë funksional për disa vite, pastaj ky institut është mbyllur”, ka thënë ai.
Analisti ligjor ka thënë se instituti për krimet e luftës është mbyllur në kohën kur në qeverisje ka qenë ish-kryeministri Ramush Haradinaj, me arsyetimin se nuk ka treguar rezultate.
“Më duket që Qeveria e Haradinajt e ka mbyllur institutin, për arsye që nuk ka treguar shumë rezultate deri në mbylljen e tij. Shkaqet kanë qenë të ndryshme, ndoshta edhe stafi që ka qenë i vogël që ka punuar. Tani me ardhjen e qeverisë së re, qeveria i ka disa iniciativa për ballafaqimin me të kaluarën”, ka thënë ai. /teve1.info/
