Sipas aktakuzës, më 15 qershor 2022, të pandehurit në stacionin policor të Fushë Kosovës e kanë keqtrajtuar fizikisht dhe psiqikisht të dëmtuarin L.H.
Zyrtarët policorë – gjithnjë sipas aktakuzës, fillimisht e kishin ndalur të dëmtuarin në qytet dhe për shkak të një kundërvajtjeje në trafik dhe atij i kishin marrë dokumentet dhe i kishin kërkuar që të paraqitej në stacion policor.
Tutje, në aktakuzë thuhet se pasi kishte arritur në stacion, të dëmtuarin e kishin vendosur në zyre dhe gjatë përpilimit të kundërvajtjes, ata fillimisht e kishin fyer dhe cenuar dinjitetin e tij e pastaj e kishin sulmuar fizikisht duke e goditur me grushte në fytyrë.
“Me këtë, në bashkëkryerje, të pandehurit kanë kryer veprat penale të lartcekura. Prokurori i çështjes me rastin e ngritjes së aktakuzës, i ka propozuar Gjykatës që të pandehurit e lartcekur të shpallen fajtor dhe të dënohen sipas ligjit për veprat penale të cila iu vihen në barrë”, thuhet ndër tjerash në njoftim./teve1.info/
