Ndalesë të parë patën varret e dëshmorëve ku nderuan kontributin e tyre për lirinë e Republikës.
Më pas, shefja e shtetit, Vjosa Osmani bashkë me të parin e Deçanit, Bashkim Ramosaj morën rrugën për në kullën e Haradinajve, në 27 vjetorin e Epopesë e Dukagjinit.
Aty i priti, ish komandanti i zonës së Dukagjinit, Ramush Haradinaj.
Në Gllogjan, erdhi edhe i pari i kuvendit, Glauk Konjufca dhe përfaqësuesi i familjes Jashari, Baca Rifat.
Sakrifica e Haradinajve, u vlerësua lartë nga presidentja Osmani.
“Familja Haradinaj dhe i gjithë Gllogjani u ngritën në këmbë për t’i shndërruar këto kulla në fortifikatë të lirisë dhe shumë prej atyre që luftuan ranë dëshmorë e shumë të tjerë vazhduan të kontribuojnë për lirinë e Kosovës. Prandaj, është borxh i yni si institucione si qytetarë të kësaj republike te lirë e sovrane që gjithnjë të nderojmë sakrificën e familjes Haradinaj dhe të gjithë atyre qe ranë për liri”, u shpreh Osmani.
Pas pritjes së mysafirëve, në Gllogjan u mbaj edhe një manifestim për shënimin e kësaj dite.
Në rendin e parë u pa nëna e heronjve, Ruke Haradinaj nën emocione.
E djali i saj, Ramushi kujtoi përpjekjet e mëdha të familjes për ta çliruar vendin nga armiku.
Ai përmendi, heroizmin e Himë Haradinaj, të Gazmend dhe Agron Mehmetaj.
“Ishim sulmuar në shtëpinë tonë, Dauti ishte i pari që u përball me ta. E menjëherë me hapjen e luftës frontale forcat serbe në vijën e parë të zjarrit njësi të këmbësorisë të kombinuar e forca të tjera, njësi të mjete të motorizuara, topa 20 milimetra dhe po ashtu mbështetje nga ajri me helikopter. Përballja e pare mu në shtëpinë tone aty ku ndodhi për një periudhë prej dy orësh kemi rezistuar ne shtëpi. Pastaj kemi marr vendim qe me u nda ne dy grupe. Nëna, Syzan edhe fëmijët e vegjët të asaj kohe me marr një rrugëtim me ik nga vend luftimi për me u liru civilet. Ndërsa motra e madhe Mema, Hilmija, Shkëlzeni, Dauti, Frashëri , Enveri kemi vazhdu bashkë”, u shpreh Haradianj.
E për këtë betejë të fuqishme foli edhe kryetari i Gjakovës, Ardian Gjini.
“Prekazi dhe Gllogjani janë të lidhura mes vete në mënyrën më të jashtëzakonshme të mundshme e kanë nis historinë tonë të re, e kanë nis lirin tonë.Çka kish ndodh me popullin tonë me i pas pa këto dy familje emblematike tu u dorëzu. Kryetar Haradinaj, për shkak se nuk jeni dorëzu e për shkak se keni jetu me luftu edhe ma tutje krejt populli i Kosovës ka marrë zemër është ngjallë, është qu në këmbë, kanë besu që mundemi me bo diçka”, tha ai.
Më 24 mars 1998, në Gllogjan është zhvilluar beteja frontale nga forcat e UÇK-së dhe forcave serbe, të cilat e kishin rrethuar Gllogjanin, ndërsa synim kishin shtëpinë e familjes Haradinaj, ku hasën në rezistencë të fuqishme.
Në këtë ditë ranë dëshmorë Him Haradinaj, Gazmend e Agron Mehmetaj.
