Autori: Adea Mustafaj
Në këtë kodër, në Bajrak të Luzhnicës ku shihet thuajse e gjithë Kosova, prehet trupi i komandatit të Brigadës 121 të Zonës Operative të Pashtrikut, Ismet Jashari i njohur si Komandant Kumanova.
Çdo 25 gusht, tash e 27 vite te varri i ish eprorit të tij të Ushtrisë Çlirimtare të Kosovës, vjen Hajdin Zogaj.
I emocionuar, për komandantin për të cilin zgjedh fjalët më të mira, ai tregon pse kishe dashur Kumanova ta varrosej pikërisht këtu.
“Këtë ditë e kujtojmë me mall qysh me thonë se jena konë bashk këtu disa, por këta fatin e kanë, janë dëshmor na sot jemi metë….Komandantin e kujtojmë një Komandant shumë të zotin, një komandant që na ka pri gjithmonë luft përpara….Unë e kom të nime Komandant Kumanova, kur ka ardh prej Shqipërisë këtu, paska pas pushu në këtë vend edhe thotë nëse unë vritna do të varrosëm këtu. Se po u shike shumë pjesë të Kosovës. Kështu e kom dëgju unë”, ka thënë Zogaj.
Kumanovën, në përjvjetorin e rënies e kujtoj në një mënyrë të veçantë Fatmir Limaj, ish komandant Çeliku.
Ai në Kleçkën, siç e quajti legjendare, erdhi i veshur me uniformë heroike për të nderuar Jasharin.
Limaj, tha që kjo datë më vlerë është vendtakim i të gjallëve me shokët që kanë rënë dhe familjarët e tyre për të kujtuar veprën e tyre, krenarinë e sakrificën që kanë bërë ushtarët e kësaj brigade.
Homazhe për Kumanovën bëri edhe Kryeministri në detyrë, Albin Kurti dhe deputetë të Kuvendit
Derisa komandantin e Brigadës 121 e kujtoj edhe shefja e shtetit.
Gjithë këta e kujtuan dhe vlerësuan veprën heroike dhe patriotizimin e Kumanovës.
E homazhe u bënë edhe në varrezat tjera ku prehen edhe 66 dëshmorë të Brigadës 121.
Ismet Jashari, i njohur si Komandant Kumanova me shumë bashkëatdhetarë erdhi nga Zvicra për të luftuar për çlirimin e Kosovës pas Epopesë së Prekazit, më 5.6.7 mars të vitit 1998, Jashari bën përgatitjet e fundit për të hyrë në Kosovë.
Kumanova ka rënë heroikisht më 25 gusht të vitit 1998 në Bajrak të Luzhnicës.
