Sot shënohen 27 vjet nga Masakra e Rezallës në Skenderaj, ku më 5 prill 1999 forcat ushtarake, policore dhe paramilitare serbe ekzekutuan 98 civilë shqiptarë, banorë të këtij fshati dhe zonave përreth.
Sipas të dhënave, një pjesë e viktimave, gjithsej 44, ishin zhdukur me forcë, ndërsa trupat e disa prej tyre u gjetën më vonë në Rudnicë të Rashkës dhe iu kthyen familjarëve. Masakra ndodhi pasi forcat serbe rrethuan shtëpitë dhe pushkatuan pothuajse të gjithë burrat dhe djemtë e rinj, ndërsa vetëm tre persona arritën të mbijetojnë.
Kjo ngjarje konsiderohet si një ndër masakrat më të rënda dhe më çnjerëzore të kryera gjatë luftës në Kosovë.
Në përkujtim të kësaj dite, ka reaguar edhe kryetari i OVL-UÇK-së, Hysni Gucati, i cili e cilësoi masakrën si një krim barbar të kryer nga forcat serbe.
“Si sot e kujtoj këtë masakër barbare në Rezallë, ku mbi 100 persona u vranë e u masakruan nga ushtria, policia dhe paramilitarët serbë”, është shprehur ai.
Gucati ka theksuar se kjo masakër dëshmon për krimet që janë kryer në gjithë territorin e Kosovës, duke shtuar se gjatë muajve në vijim do të realizohen vizita në të gjitha vendet ku kanë ndodhur masakra për të nderuar të rënët.
Ai po ashtu ka bërë thirrje për respekt dhe kujdes ndaj historisë së luftës, duke theksuar obligimin qytetar për të vizituar varrezat dhe për të qëndruar pranë familjeve të viktimave.
“Këtu sot kish me qenë mirë të jetë edhe protagonisti i librit Shkëlzen Gashi, me ekipin e vetë me ata shqipfolësit të shohin këtë pllakë me emra dhe mbiemra të le ta dijë se këtu në këtë vend ka pasur masakër. Jo vetëm në këtë vend, por në të gjithë territorin e Kosovës ka pasur masakra. Dhe ky muaj që fillon tashmë në qershor, ne do të shkojmë në vizita në të gjitha masakrat dhe të rënët do t’i vizojmë. Ne sot e kemi obligim qytetar, unë dhe Xhavit Jashari si dhe të gjithë qytetarët që t’i vizitojmë këto varre, të paktën moralisht të jemi pranë tyre, dhe vizitë te familjarët e tyre. Lavdi e përjetshme gjithë këtyre. Turpi për ata që tentuan ta devijojnë historinë e shqiptarëve në Kosovë”, deklaroi ai. /teve1.info/
