26 vjet pa një përgjigje .Që nga 16 maji i vitit 1999 nuk dihet asgjë për fatin e veprimtarit të çështjes kombëtare, Ukshin Hot.
Ai për herë të fundit u pa në Burgun e Dubravës ku po vuante dënimin.
Me dhimbje e mall Ukshinin e kujton veprimtari tjetër i çështjes kombëtare, Isak Shabani, i cili qëndroi me të nëpër qelitë e burgut të Mitrovicës, Nishit dhe Dubravës.
Shabani nga “Reporting House” tregon se Hoti nuk u nënshtrua kurrë pavarësisht se përjetoi dhunë të tmerrshme nga gardianët serbë në burgun e Nishit.
“Ne burgun e Nishit jemi përballur me dhunë të tmerrshme prej gardianëve serbë. Ata ishin te pajisur me mjete te forta duke përfshirë shkopinj të bejsbollit por edhe shufra gome. Kur na goditnin disa prej nesh e ulnim kokën por jo edhe Ukshin Hoti i cili gjithmonë qëndroi vertikalisht” , thotë ai.
Shabani thotë se autoritetet serbe e kishin planifikuar rrëmbimin e Hotit andaj sipas tij nuk ishte rastësi që atë e nxorën nga burgu në ditën e shtunë.
“Nuk ishte rastësi që serbët ne ditën e shtunë nxorën nga burgu Ukshinin. Nuk ishte e zakonshme që në atë ditë të liroheshin të burgosurit politikë. Asnjëherë më parë nuk kishte ndodhur një gjë e tillë”, thotë Shabani.
Ukshin Hoti ishte arrestuar në vitin 1994 nga policia serbe me akuzën e ushtrimit të veprimtarisë armiqësore kundër Jugosllavisë dhe për pjesëmarrjen e tij në lëvizjen për Republikën e Kosovës, me ç’rast ishte dënuar pesë vjet burg.
