Shyqerije Ibrahimi i ka të freskëta ngjarjet e hidhura të 25, 26 dhe 27 marsit 1999.
Bashkëshorti i saj është në mesin e 82 personave të vrarë, në masakrën e forcave serbe në fshatin Celinë të Rahovecit.
“Kur u bë ora 10:30 minuta na kanë ardh në oborr tonin, së pari ka hy tenka e madhe i ka thy dyrtë, kanë hy mrena na kanë rre, na kanë shkelmu, na kanë vendos kokën në beton deri kur më ka plas gjaku për vesh, për hunde e për gojë, na kanë leshu”, rrëfen Shyqerije Ibrahimi – gruaja e dëshmorit Hysni Ibrahimaj
Përveç burrit, Ibrahimi nuk dinte asgjë as për fëmijët e saj.
“Ajo me fëmijë është largu, 21 ditë nuk e kam ditë fëmijët ku i kam, a i kam gjallë, a i kam vdekur, burrin ma mbyten në atë shtëpinë, ma vështirë mo sdi çka me thonë”, thotë ajo.
Plagët janë ende të hapura edhe për Sevdije Sinanin.
“Axhën ma kanë vra, dy vllaznitë mi kanë vra, një çikës m’ia kanë vra burrin, katër çika i ka. Qysh e shohim ne a, çka me bo, si sot, si atë ditë me kon, si atë ditë me kon, … dy vllazën”, thotë Sevdije Sinani – familjare e dëshmorëve.
18 nga 82 trupat e vrarë, ishin djegur nga forcat serbe.
Për të kujtuar viktimat, në Celinë gjatë ditës ishte edhe kryeministri Albin Kurti.
“26 vite më parë rreth orës 09:30 të mëngjesit rreth 500 ushtarë të Serbisë hynë në Celinë nga katër drejtimet. Në këtë masakër i vranë 82 civilë të moshave të ndryshme, 18 nga trupat i dogjën e 13 nga të vrarit ishin fëmijë. I kujtojmë me dhimbje, Albanin, Bledarin, Besartin, Altinin, Albulenën, Suzanën, Burbuqen, Ramazanin, Mejremen, Gëzimin, Bedrushin, Albanin, si dhe Almën e cila ishte vetëm 18 mujshe”, u shpreh Kurti.
Përkundër që kanë kaluar 26 vite nga kjo masakër, drejtësia asnjëherë nuk është vënë në vend.
Ky fakt, familjarëve çdo përvjetor po ua bën më të rëndë.
