Në 25-vjetorin e rrëzimit të regjimit kriminal të Sllobodan Millosheviqit, ish-ministri i Punëve të Jashtme të Kosovës, Enver Hoxhaj, ka deklaruar se fundi i atij regjimi hapi një kapitull të ri për rajonin, megjithatë plagët që ai la pas ende nuk janë shëruar.
Sipas Hoxhajt, Serbia, në vend që të përballej me të kaluarën e saj, ka zgjedhur ta glorifikojë atë, duke u udhëhequr edhe sot nga figura që dikur ishin pjesë e regjimit të Millosheviqit.
“Sot shënohen 25 vjet nga rrëzimi i regjimit kriminal të Sllobodan Millosheviqit, regjim që shkaktoi luftëra, gjenocid dhe shkatërrim në gjithë Ballkanin. Fundi i tij hapi një kapitull të ri për rajonin, por plagët që la pas ende nuk janë shëruar. Në vend që të përballej me të kaluarën, Serbia ka zgjedhur ta glorifikojë atë, duke u udhëhequr edhe sot nga figura që ishin pjesë e regjimit të atëhershëm”, ka shkruar ai në Facebook.
Hoxhaj ka theksuar më tej se, në kohën kur Serbia përpiqet të rikthejë ndikimin e saj të dikurshëm përmes destabilizimit dhe propagandës, Kosova duhet të mbetet e palëkundur në orientimin e saj euroatlantik
“Sot, në një kohë kur Serbia po përpiqet të luajë rolin e satelitit të Rusisë në Ballkan dhe të sfidojë rendin euroatlantik, Kosova duhet të mbetet e palëkundur në boshtin e saj perëndimor. Ndërsa Beogradi përpiqet të rikthejë ndikimin e vjetër përmes destabilizimit dhe propagandës, përgjigjja jonë duhet të jetë forcimi i shtetit, sigurisë dhe institucioneve demokratike. Partneriteti me SHBA-në, NATO-n dhe aleatët evropianë është garancia e vetme për paqe, qëndrueshmëri dhe mbrojtjen e interesave të Kosovës në rendin e ri ndërkombëtar”, ka përfunduar ai.
