25 vite ia ka dedikuar shërbimit në ekipin emergjent në Suharekë. E m’u para pensionit, vozitësi i autoambulancës Zymer Gashi rrëfen për përjetimet më të dhimbshme të kësaj pune. Ai poashtu thekson se paga e tij me ardhjen e qeverisë Kurti është zbritur për 180 euro.
Me shpejtësi po kthehet në Emergjencë.
E të gjithë në komunikacion po ia lirojnë rrugën.
Me të hyrë në oborrin e QMF-së në Suharekë, vozitësi Zymer Gashi ngutet për të njoftuar ekipin për ndihmë.
E këtë punë e bën tash e 25 vite me përkushtim të plotë.
Ndërsa edhe një vit, vozitësi i autoambulancës del në pension.
Ndërsa nga këto dy dekada pune në ekipin emergjent, ai ka përjetuar raste shumë të rënda.
“25 vjet, punë e lodhshme, punë e dhimbshme është shumë. Kemi raste shumë të vështira por ato po i përballojmë krejt. Jemi bo pak njëjtë po është e vështirë se pa marrë parasysh është trupi i njerit është vështirë ta shohësh nën rrugë, nën kamion, autobus, çka s’kemi përjetu, shprehet Gashi.
Gashi tregon se vetëm brenda një nate, këtë makinë e nxori nga baza rreth dhjetë herë.
E secili prej rasteve ishte më i rëndë se tjetri.
“Shtatë herë kemi qenë në Prizren, një herë në fshatin Gjinoc, tash brenda 11 ore shtatë herë në Prizren, kemi pasë një rast gjuajtje me automatik që ka qenë në Suharekë, në Shtëpi të Pleqve kemi shku e kemi konfirmu një vdekje, gjithë natën pa u ulë hiç. Se i bijke 10 – 11 herë kerri me dalë prej bazës, është goxha e rëndë”, thotë ai.
Por ndonëse e bën gjithë këtë punë, Zymer Gashi i merr 180 euro më pak në rrogë.
Sipas tij, atij i janë hequr shtesat e ushqimit, të përvojës së punës, ndërsa u është zbritur paga edhe për punën gjatë natës.
“Po tash çka është më e keqja me qeverinë aktuale na kanë zbritë edhe rrogat, mu m’i ka zbritë, 180 euro i marr si ka ardhë Albin Kurti në qeveri, unë e marr 180 euro në muaj mangu. Shujtjen, përvojën e punës, natën e kemi pasë 18-20 euro natën e na ka bo 4 euro. Natën me punu me katër euro është turp, turp”, thotë Gashi.
Gashi thekson se është i gatshëm për t’u dalë në ndihmë qytetarëve natë e ditë, sa herë që ka nevojë.
Megjithatë ai bën thirrje që të kenë kujdes në komunikacion, ndërkaq nga qeveria kërkon zgjidhjen e problemit me paga.
