Kryeministri i Kosovës, Albin Kurti, i ka uruar mësimdhënësit për Ditën e Mësuesit, 7 Marsin, derisa i ka ndarë çmimin “Shaban Jashari” mësimdhënëses Shkëndije Jashari nga shkolla Fillore “Meto Bajraktari” në Prishtinë, raporton teve1.info
Sipas komunikatës së Qeverisë, Kurti ka thënë se beteja e mëismdhënësve të Kosovës për arsimim dhe edukim në njërën anë dhe ajo për liri në anën tjetër nuk kanë qenë të ndara kurrë.
“Duke u uruar Ditën e Mësuesit të gjithë mësimdhënësve, ai tha se historikisht tek populli ynë angazhimi për arsimimin dhe edukimin shqip në njërën anë dhe beteja për liri kombëtare në anën tjetër nuk kanë qenë asnjëherë të ndara”, ka thënë Kurti.
Sipas komunikatës, në ceremoninë për nder të 7 Marsit, kryeministri Kurti së bashku me zëvendësministren e Arsimit, Edona Maloku Bërdyna ndanë mirënjohje për mësimdhënës të dalluar nga secila komunë.
“Teksa ndodhemi në ditën e tretë të Epopesë së Ushtrisë Çlirimtare të Kosovës, kryeministri Kurti po ashtu dhe natyrisht ka kujtuar Shaban Jasharin, mësues i djemve të tij, i Hamëz e Adem Jashari, por edhe mësues në Drenicë e në Prekaz, ku tash shkolla atje e mban emrin e tij.
E çmimi që mban pikërisht emrin e Shaban Jasharit, në këtë manifestim iu nda mësueses Shkëndije Jashari nga Shkolla Fillore e Mesme e Ulët “Meto Bajraktari” në Prishtinë”, thuhet në komunikatën e Qeverisë.
