Deputetja e Partisë Demokratike të Kosovës, Ganimete Musliu ka thënë se dënimi prej gjashtë muajsh për personin që e kishte kërcënuar është shumë i ulët, raporton teve1.info
Përmes një reagimi publik në Facebook, Musliu ka thënë se gjuha me të cilën partia në pushtet i ushqen militantët e saj është e urrejtjes dhe mosdurimit.
Ajo këto reagime i bëri pas vendimit të Gjykatës Themelore në Prishtinë për dënim me burgim prej 6 muajsh ndaj të dyshuarit për kërcënim të deputetes Musliu muaj më parë.
“Sot Gjykata e dënoi me gjashtë muaj burg personin që më kanosi në dhjetor të vitit të kaluar, pas një debati të ashpër që kisha me kryeministrin Kurti në seancë plenare. Ky person që më kanosi nga Zvicra, të premten në seancë tha se “nuk voton në Kosovë prej 20 vitesh” dhe pranimin e fajësisë e bëri krejt formalisht e në mënyrë të pasinqertë. Por, në një pikë ai ishte shumë i sinqertë. Deklaroi se “kishte rënë nën ndikimin e propagandës së Lëvizjes Vetëvendosje”. Ky është një shembull konkret se gjuha me të cilën partia – shtet i ushqen militantët e saj, është gjuhë e urrejtjes, përçarjes dhe mos durimit. Dhe si e tillë jo vetëm e papranueshme por edhe e dënueshme”, ka shkruar ajo në Facebook.
Musliu ka paralajmëruar se do të ndërmarrë veprimet e nevojshme për të kundërshtuar dënimin prej gjashtë muaj burgim, meqë sipas saj është “shumë i ulët”.
“Përndryshe, konsideroj se dënimi ndaj personit që më kanosi, është shumë i ulët dhe do të konsultohem me avokatin tim për të ndërmarrë veprimet e nevojshme për ta kundërshtuar me ankesë”, përfundoi ajo.
Dënohet me gjashtë muaj burgim mërgimtari i akuzuar për kanosjen e deputetes Ganimete Musliu