Aeroporti Ndërkombëtar “Adem Jashari” në Prishtinë pritet të shtoj edhe katër porta të reja, raporton teve1.info
Sipas komunikatës së lëshuar nga vet Aeroporti, një vendim i tillë u miratua nga Komiteti për Partneritet Publiko-Privat me kërkesë të koncesionarit “LKIA”, duke arritur kështu në 12 porta gjithsej nga 8 sa ishin deri tash.
“Në mbledhjen e fundit të Komitetit për Partneritet Publiko-Privat të mbajtur me 29 maj, 2023 është miratuar kërkesa e koncesionarit LKIA për shtimin edhe të 4 portave të reja të imbarkimit (boarding gates), duke e rritur kështu numrin e portave nga 8 në 12 gjithsej.
Zgjerimi i terminalit do të bëhet në anën jugore dhe në anën veriore të portave ekzistuese të imbarkimit, ndërsa buxheti i paraparë për këtë plan në total është rreth 3 milionë euro.
Meqenëse Plani i Zgjerimit bie nën kompetencat e Partnerit Privat, zgjerimi i terminalit do të bëhet pa asnjë shpenzim shtesë për Dhënësin apo Qeverinë e Republikës së Kosovës”, thuhet në komunikatë.
Sipas Aeroportit, ky zgjerim synon që të rrisë kapacitetin e terminalit për të përballuar flukse më të mëdha të udhëtarëve, por edhe rritjen e komoditetit për pasagjerët që të kenë sa më të lehtë kalimin nëpër kontrollet e aeroportit.
Në njoftim thuhet po ashtu se Aeroporti “Adem Jashari” i ka rritur të ardhurat bruto në vitin 2022 krahasuar me vitin paraprak për 36.91 për qind apo mbi 60 milionë Euro.
Ndërsa numri i udhëtarëve u rrit për gati 1 milion më shumë.
“Sipas Raportit mbi Pasqyrat Financiare të Auditorit të Pavarur, të Ardhurat Bruto për vitin 2022 ishin 60,177,176€ apo 36.91% më të larta sesa viti paraprak, ndërkaq numri i udhëtarëve u rrit nga 2,198,414 në 3,012,108 pasagjerë, që paraqet një rritje prej 37%”, thuhet në komunikatë.
