Të martën në Bruksel, Kosova dhe Serbia kanë miratuar Deklaratën për të zhdukurit gjatë luftës së fundit në Kosovë.
E këtë Deklaratë ish-kryenegociatorja e Kosovës për bisedimet me Serbinë, Edita Tahiri po e quan të pa pranueshme, pasi sipas saj, barazimi i agresorit me viktimën është i pa pranueshëm, ani pse u pranua nga kryeministri i Kosovës, Albin Kurti, shkruan teve1.info
“Barazimi i agresorit me viktimën në deklaratën për të pagjeturit i miratuar dje në dialog në Bruksel është i papranueshëm pavarësisht se u pranua nga kryeministri i Kosovës”, ka shkruar Tahiri në Facebook.
Ndryshe, të martën kryeministri i Kosovës, Albin Kurti dhe presidenti i Serbisë, Aleksandër Vuçiq, miratuan në Bruksel një Deklaratë të përbashkët për personat e zhdukur gjatë luftës në Kosovë nëpërmjet së cilës ata zotohen për “zbatimin e plotë të detyrimeve” për ndriçimin e fatit të të zhdukurve.
Deklarata u miratua në fillim takimit në Bruksel, në kuadër të bisedimeve për zbatimin e një marrëveshjeje për normalizimin e marrëdhënieve ndërmjet të dyja vendeve.
Në deklaratë thuhet se palët do të “bashkëpunojnë ngushtë në identifikimin e lokacioneve të varrezave dhe të angazhohen në gërmimin e tyre, do të sigurojnë qasje të plotë në informata të besueshme e të sakta që ndihmojnë në gjetjen dhe identifikimin e personave të zhdukur gjatë periudhës kohore nga një janari i vitit 1998 deri më 31 dhjetor të vitit 2000”. Më tej thuhet e këtu përfshihen “të gjitha materialet, shkrimet, urdhrat, dokumentet, video incizimet, audio incizimet dhe çfarëdo lloj dokumenti tjetër, duke përfshirë edhe ato që cilësohen si të klasifikuara në institucionet përkatëse të të dyja palëve”./teve1.info