Kryetari i Partisë Demokratike të Kosovës, Memli Krasniqi, i ka uruar qytetarët për 12 qershorin e cila njihet si Dita e Çlirimit të Kosovës, raporton teve1.info
Përmes një statusi në Facebook, Krasniqi ka shkruar se në këtë ditë i kujton të gjithë luftëtarët e UÇK-së, dëshmorët, invalidët, veteranët, të zhdukurit, martirët e gratë e dhunuara.
Krasniqi ka përmendur edhe ish krerët e UÇK-së që po mbahen në Hagë, për të cilët ka thënë se beson në rikthimin e shpejt të tyre.
“Me kujtimin për qindra e mijëra qytetarë të vendit tonë, të cilët, ndër breza, sakrifikuan gjithçka që patën për liri;
Me nderimin për mijëra luftëtarë të UÇK-së, dëshmorë, invalidë e veteranë, të cilët me heroizimin dhe flijimin e tyre mundësuan dhe shtruan rrugën tonë të drejtë;
Me dhembjen më të madhe e të paharruar për martirët, viktimat civile, të zhdukurit, gratë e dhunuara dhe refugjatët – viktima të një sistemi gjenocidal;
Me besimin në pastërtinë e luftës për liri dhe në rikthimin e shpejtë të çlirimtarëve tanë në mesin tonë;
Me respektin më të lartë për miqtë dhe aleatët tanë ndërkombëtarë, të cilët, kur na duhej më së shumti, ishin aty për ne – për të finalizuar përpjekjen shekullore për liri;”, ka shkruar ndër të tjera Krasniqi.
