Kryeministri i Kosovës, Albin Kurti, e ka vizituar një fabrikë të biçikletave në Gjilan, e cila i ka punësuar 12 të rinj përmes platformës “Superpuna”, raporton teve1.info
Parmes një statusi në Facebook, Kurti ka bërë të ditur se ky biznes i ka shfrytëzuar masat e e Qeverisë që kanë për qëllim ndihmesën e bizneseve, derisa ka shkruar se ka përfituar shumë.
“Fabrika e Biçikletave “Albimi LTD” në Gjilan, është përfituese e trefishtë e masave mbështetëse të Qeverisë për rritje të eksportit dhe punësim.
Ajo ka përfituar nga masat 2.4 – Mbështetje e Eksportit dhe 2.1 – Subvencionim i Kredisë, të Pakos së Ringjalljes Ekonomike. Ndërkaq, së fundmi ka punësuar 12 të rinj përmes platformës Superpuna, të cilën e kemi lansuar në fillim të muajit të kaluar.
Ka rreth 70 punëtorë, paga mesatare e të cilëve është 478 euro, kurse kapacitetin e prodhimit e ka 27 mijë biçikleta në vit. Produktet e tyre, krahas tregut vendor, eksportohen edhe në shumë vende të Bashkimit Evropian si në Spanjë – rreth 23% të eksportit, Hungari, Greqi, Itali, Francë, Gjermani, Slloveni dhe Kroaci”, ka shkruar Kurti.
Kryeministri Kurti ka thënë se ky biznes është histori suksesi e ndërmarrësisë, prodhimit vendor, eksportit dhe masave mbështetëse të Qeverisë.
“Ishte kënaqësi dhe nder që bashkë me ministrin Murati, të shohim nga afër punën e tyre dhe të bashkëbisedojmë me punëtorë dhe me pronarin, Ibrahim Krivaqa”, tha Kurti.
