Kryeministrit të Kosovës, Albin Kurti, po i bëhet thirrje që të raportojë në Kuvend mbi gjendjen në veri.
Hulumtuesi në Institutin e Kosovës për Drejtësi, Naim Jakaj, tha se kanë kaluar mbi pesë ditë që kur situata në veriun e vendit ka eskaluar dhe se kryeministri Albin Kurti, nuk ka thirru seancë për të raportuar për gjendjen atje.
Jakaj tha se kryeministri i vendit ka për detyre Kushtetuese, ligjore dhe me rregulloren e Kuvendit që të thërret seancë të jashtëzakonshme që ta informoj Kuvendin dhe deputetët, njëkohësisht edhe qytetarët për gjendjen e krijuar në veri.
“Për situatën dhe gjendjen e krijuar në komunat e veriore të Kosovës, ne jemi në dijeni edhe i kemi parë zhvillimet që kanë ndodhur atje që nga e premtja e kaluar dhe në ndërkohë behën 5 ditë që kur kryeministri i Kosovës Kurti nuk ka thirrur ndonjë seancë të jashtëzakonshme edhe pse kjo kompetencë i takon më Kushtetute, ligj dhe me rregulloren e Kuvendit. Kemi një gjendje të jashtëzakonshme në ndërkohë ne informohemi prej tij vetëm përmes komunikatave dhe përmes postumeve të tij përmes rrjeteve sociale. Kryeministri ka për detyre Kushtetuese, ligjore dhe me rregulloren e Kuvendit që të thërret seancë të jashtëzakonshme, ta informoj Kuvendin dhe deputete, njëkohësisht edhe qytetarët për gjendjen e krijuar”, tha ai.
Ai tha se në lidhje me këtë nuk ka asnjë seancë të jashtëzakonshme të thirrur as nga Kuvendi i Kosovës, e që sipas tij kjo është shumë shqetësuese edhe është e pa kuptimtë se si Kuvendi nuk e luan rolin e vet.
“Në ndërkohë nuk kemi asnjë seancë të jashtëzakonshme të thirrur nga Kuvendi i Kosovës kompetencë të cilën e kanë një e treta e deputetëve dhe kryetari i Kuvendit. Për ne kjo është shumë shqetësuese edhe është e pa kuptimtë se si Kuvendi nuk e luan rolin e vet. Kalojnë 5 ditë, kemi reagimin e ambasadorit amerikan në Kosovë, kemi reagimin e sekretarit të shtetit amerikan Blinken, kemi reagimin e përfaqësuesve më të lartë të BE-së të cilët janë të përfshirë edhe në dialog dhe kemi reagime të Departamentit të Shtetit Amerikan, në ndërkohë nuk kemi një reagim që kishte me qenë në formatin e informatës për Kuvendi edhe qytetarët se cila është gjendja atje dhe çka do të bëhet më tutje”, ka deklaruar Jakaj./EO/
