Presidentja Osmani tha se Zahir Pajaziti ishte lajmëtar i lirisë së Kosovës.
“Në këtë 26 vjetor të rënies së heronjve tanë i përkujtojmë si lajmëtar të lirisë, për frymëzimin e jashtëzakonshëm që dhanë Zahiri me shokë për të gjithë ushtarët e UÇK-së, për të gjithë ata që luftonin së bashku me Zahirin duke iu dhënë frymëzim më të madh por edhe ata që luftonin pas rënies së Zahirit.
Kjo ditë është ditë e shënuar e Republikës e cila u ndërtua mbi themelet e forta për shkak se u ndërtuan mbi gjakun e dëshmorëve dhe heronjve tanë. Përkujtimi për ta, respekti për ta do të mbes i përjashtëm por edhe puna jonë e shtetit që u ndërtua me sakrificë, me gjak do ta ketë udhërrëfyes pikërisht këtë shembull që u dha 26 vjet më parë”, tha Osmani.
Homazhe bëri edhe kryeministri Albin Kurti, i cili tha se duke i kujtuar dëshmorët si Zahir Pajaziti, kujtohet sa i madh ishte çmimi i lirisë.
“Ata ishin kushtrimi për luftë çlirimtare por njëkohësisht ishin edhe pararendës të luftës çlirimtare të Kosovës meqenëse ata kryenin aksione çlirimtare edhe para se të fillonte lufta. Duke kujtuar dhe përkujtuar komandantin Zahir Pajaziti dhe dëshmorët e tjerë ne tregojmë se sa i madh ishte çmimi për lirinë tonë, për shtetin tonë dhe se sa i vlefshëm për të tashmen dhe të ardhmen është ky përkujtim si nga institucionet e ashtu edhe nga qytetarët tanë”, tha Kurti.
Ndërsa, zëvendëskryeministrja dhe ministrja e Jashtme, Donika Gërvalla, tha se sakrifica e të gjithë heronjve duhet të jetë udhërrëfyes për ta bërë Kosovën ashtu siç ata dëshiruan.
“Është e rëndësishme që të kujtohet sakrifica e tre heronjve që po kujtojmë sot, të gjithë ushtarët trima të UÇK-së dhe të gjithë ata që rezistuan në çfarë do mënyre deri në lirimin e Kosovës. Është e rëndësishme që kjo sakrificë të jetë udhërrëfyesi ynë në punët që kemi çdo ditë”, tha ajo.
Bashkë me presidenten Osmani, kryeministrin Kurti dhe zëvendëskryeministren dhe ministren e Jashtme, Donika Gërvalla, ishin edhe deputetë të tjerë të cilët vendosen lule të freskëta te përmendorja e komandantit Zahir Pajaziti në Prishtinë.
Me Zahir Pajazitin, 26 vjet më parë, kishte rënë edhe Hakif Zejnullahu dhe Edmond Hoxha, në luftë kundër okupuesit serb në Pestovë të Vushtrrisë.
