Kryetari i Bashkimit të Sindikatave të Pavarura të Kosovës (BSPK), Atdhe Hykolli i ftuar në emisionin Respublika në Tëvë 1 ka folur veç të tjerash për sigurinë e punëtorëve në vendin e punës dhe për çështjen e inspektorëve.
Hykolli ka thënë se nëse do të kishte dënime më të rrepta për kompanitë që dështojnë të ofrojnë siguri në punë, edhe kujdesi do të ishte më i lartë.
“Kryesisht sindikatat si target e kanë Inspektoriatin e Punës, mirëpo edhe përkundër ankesave nuk e di ku po përfundojnë këto aksidente që janë shumë të dhimbshme. Ne flasim që është një numër i vogël i Inspektorëve të Punës. Jam dakord me atë mirëpo po të kishin qenë edhe dënimet edhe ligjet shumë më të rrepta, unë mendoj se do të kishim një kujdes pak më të madh, edhe punëdhënësit në raport me të punësuarit. Kështu që unë mendoj se ligji duhet të jetë shumë shumë më i madh në raport me këto dënime kur të jepen”, ka deklaruar Hykolli.
Ai kërkon shtim të numrit të inspektorëve dhe gjoba strikte për kompanitë që shkelin ligjin e punës.
“Pika e parë kishte qenë mirë që të rritet numri i inspektorëve dhe ata të jenë në terren. Më pastaj të jenë gjobat për ata që e shkelin ligjin, të jenë shumë strikte dhe shumë të mëdha që prej gabimit të njërës kompani të mësojë kompania tjetër. Unë besoj shumë se do të kishim pasë një situatë pak më stabile”, ka thënë tutje ai.
“Në momentin kur ne ju ofrojmë kushte më të mira të punësuarve, atëherë edhe kërkesa duhet me qenë më e madhe për të gjitha institucionet të cilat e kryejnë punën e vet. Duhet të shikohet polici a e kryn punën me nder, mësimdhënësi, gjyqtari, prokurori e të gjithë të tjerët që janë zbatues të ligjit. Kështu që po të kemi këtë situatë ne ndoshta do të ecim përpara”, ka shtuar Hykolli.
