Përmes një komunikate për media ku është prezantuar raporti vjetor, IPK thotë se 2.3 për qind e punonjësve të Policisë kanë qenë subjekt hetimi nga ta.
“IPK gjatë vitit 2021 ka pranuar dhe ka menaxhuar me 2013 ankesa dhe informata që në krahasim me vitin e kaluar ka një ngritje të numrit të ankuesve (vitin e kaluar IPK ka trajtuar 1658 ankesa). Prej tyre 1331 ankesa që janë klasifikuar si shkelje disiplinore e profilit të ultë janë përcjellë për t’u trajtuar në Drejtorinë për hetime të brendshme dhe verifikim të së kaluarës në Policinë e Kosovës”, thuhet ndër tjerash në raport.
Tutje, Inspektorati njofton se gjatë 2021-ës janë kryer 38 arrestime, 85 suspendime dhe 10 transfere të zyrtarëve.
“Një ndër funksionet bazë të Inspektoratit Policor të Kosovës është edhe zhvillimi i inspektimeve ndaj Policisë së Kosovës. Këto inspektime realizohen në mënyrë që përmes tyre të bëhet identifikimi dhe parandalimi i çfarëdo devijimi nga aktet ligjore dhe procedurat me të cilat funksionon Policia e Kosovës. Në përmbushje të përgjegjësive dhe detyrave, Divizioni i Inspektimit dhe Raportimit në kuadër të Departamentit të Inspektimit në drejtim të vlerësimit të kryerjes së detyrave policore në raport me legjislacionin dhe standardet e kërkuara, gjatë vitit 2021 ka realizuar nëntë (9) inspektime, nga të cilat, katër (4) të rregullta bazuar në Planin Vjetor të Inspektimit dhe pesë (5) të jashtëzakonshme”, thuhet ndër tjerash në komunikatë./teve1.info/.
