Autori: Jona Kelmendi
Kanë kaluar dy vite që nga mbrëmja kur emri i Liridona Ademajt u bë lajm kryesor në gjithë vendin.
Ajo u gjet e vdekur në një rast që fillimisht u raportua për vrasje si pasojë e grabitjes, e më pas Prokuroria bëri të ditur se gjithçka ishte inskenim i Naim Murselit, bashkëshortit të viktimës.
E në këtë ditë përkujtimi, vëllau i saj, Leonard Ademaj tregoi mallin që kanë për Liridonën.
Derisa ripërsëriti thirrjen për drejtësi.
“Do të luftojmë deri në frymën e fundit duke kërkuar drejtësi për ty motër. Kriminelët duhet të marrin dënimin e merituar. Тё kujtojmë me mall e shumë dashuri”, ka shkruar vëllau i Liridonës.
E procesi gjyqësor ndaj saj ende është duke vazhduar.
Mirëpo si janë rrethanat e zbardhjes së rastit tregon për Tëvë1 avokati i familjes.
“Kjo vepër penale po shkon drejt zbardhjes së shpejtë me disa seanca te cilat kanë mbetë me disa prova videomateriale, më gjegjësisht do të laborohen nga Prokuroria dhe ne si palë e dëmtuar nuk jemi të njoftuar se cilat prova materiale do t’i propozojë mbrojtja. Sidoqoftë nga fillimi i vitit të ardhshëm do të kemi një dënim të shkallës së parë nëse shkon me këtë hov të cilin e ka pasur deri më tani si rast”, është shprehur Sylaj.
E avokati Ardian Bajraktari thotë që ky rast është trajtuar në mënyrën e duhur dhe me prioritet nga Gjykata.
“Procesi gjyqësor është kah fundi, mbi të gjitha është brenda gjithë parametrave dhe afateve të përcaktuara me afate dhe dispozita të kodit të procedurës penale, çka nënkupton që edhe Prokuroria, por edhe Gjykata e ka trajtu me prioritetin e duhur. Natyrisht vrasja e Liridona Ademaj ka qenë jashtëzakonisht e rëndë dhe po shpresoj që procesi gjyqësor me këtë ritëm do të arrijë të përfundojë në shkallë të parë”, ka thënë Bajraktari.
30-vjeçarja Liridona Ademaj u vra më 29 nëntor të vitit 2023 në Prishtinë, teksa bashkë me dy fëmijët dhe bashkëshortin Naim Murseli po ktheheshin në shtëpi pasi kishin ngrënë darkë në një restorant.
Për vrasjen e saj po gjykohen Murseli, si dhe Granit Plava dhe Kushtim Kokalla.
Murseli dhe Kokalla janë deklaruar të pafajshëm, ndërsa Plava nuk ka pranuar të deklarohet për fajësinë.
