Javën e kaluar i dërguari special i Bashkimit Evropian për dialogun, Miroslav Lajçak, vizitoi Kosovën dhe Serbinë së bashku me të dërguarit gjerman e francez për dialogun, Jens Plötner e Emmanuel Bonne.
Presidenti serb tha se emisarët atij i kanë propozuar një kornizë të re për dialogun Kosovë – Serbi.
Por, nga Qeveria e Republikës së Kosovës e kanë qartësuar këtë çështje.
Zëdhënësi i qeverisë, Përparim Kryeziu, tha për Tëvë1 se nuk ka ndonjë kornizë të re për dialogun.
“Nuk ka kornizë të re të dialogut, ka diskutime për kornizën e përgjithshme e cila në fakt ka qenë një nga dy pikat kryesore të takimit të 18 gushtit në Bruksel, e për të cilën pikë tashmë ju e dini që kryeministri Kurti ka dhënë një propozim konkret me përplot gjashtë kapituj që e parasheh dhe e akomodon marrëveshjen ligjërisht të obligueshme që në qendër ka njohjen reciproke”, tha Kryeziu.
Për çështjen e një kornize të re të dialogut, ka folur edhe presidentja e vendit Vjosa Osmani, e cila ka thënë se për dialogun Kosovë – Serbi duhet një zgjidhje që garanton paqe afatgjatë.
“Sa i përket asaj që po diskutohet natyrisht që vet ardhja e tyre në Kosovë kishte për qëllim dinamizmin e procesit … Por çdo zgjidhje duhet të jetë për paqe dhe stabilitet afatgjatë sepse gjysmë zgjidhjet ose idetë të cilat nuk kontribuojnë drejt njohjes reciproke asnjëherë nuk mund të kontribuojnë as në paqen dhe stabilitetin afatgjatë”, ka thënë Osmani.
Burimet e tëvë1 bëjnë të ditur se vizita e delegacionit franko-gjerman ka paraqitur qëndrimin e tyre për një fazë të re të dialogut, takime më të shpeshta e dialog më dinamik.
Kronika e realizuar nga Valmir Gallopeni
