Dera u hap e besimtarët filluan të zënë vend.
Brenda Xhamisë së Madhe në Prishtinë, myslimanët u mblodhën për faljen e namazit të sabahut.
Derisa jashtë saj, Policia e Kosovës bllokoi rrugën për qarkullim.
E me zbardhjen e ditës xhemati u shtua.
Kjo pasi të dielën, komunitetin mysliman e bashkoi falja e Kurban Bajramit.
E për shumë prej tyre, kjo nuk ishte hera e parë që po marrin pjesë në faljen e Bajramit.
Madje për dikë sot ishte festë e dyfishtë.
Ndërsa nuk munguan lutjet e mesazhet nga ta.
E me t’u afruar koha e namazit, xhematlinjtë morën edhe instruksionet e fundit.
E në orën 5:34, erdhi edhe koha e faljes.
Pas namazit, të pranishmëve iu drejtua Myftiu i Kosovës, Naim Tërnava.
“Bashkërisht, ne duhet të bëjmë edhe më shumë në rritjen ekonomike, rritjen e standardit të një jete më të mirë në Kosovë në mënyrë që të zvogëlojmë migrimin e popullatës tonë në vende të ndryshme të botës”, tha myftiu.
Tërnava pati një thirrje edhe për qiftet bashkëshortore.
“Qiftet e reja hezitojnë të kenë më shumë se një apo dy fëmijë. Ftoj qiftet e martuara të kenë më shumë fëmijë ngase edhe këtë ia kemi borxh Kosovës tonë. Të mos frikohen qiftet e reja për rriskun e familjes ngase rrisku është kompetencë e Zotit xh.sh, të mos bëhemi shkaktarë të mbylljes së një numri të foshnjoreve, qerdheve, shkollave, xhamive”, u shpreh ai.
Në manifestimin qendror të Kurban Bajramit të dielën, nuk u pa asnjë nga krerët e shtetit.
